ORANJESTAD, Aruba – 19 di Mei 2020:  Aruba Hotel & Tourism Association (AHATA)  ta acumula e cifranan di ocupacion y prijs di hotelnan tur luna y manera por a spera, ta confirma cu na April no tabatin turismo na Aruba.  E “0” ocupacion di April a afecta e averahe di e prome 4 lunanan di 2020 di diferente manera.

Ocupacion: E ocupacion na hotelnan a baha cu 34.8 punto compara cu e mesun temporada na aña 2019, yegando grado di ocupacion di 53.6%.

ADR: E balor averahe di cada camber ocupa a subi te awor cu 6.5% compara cu e mesun 4 lunanan di aña pasa, yegando $359.14.

RevPAR: E entrada averahe pa tur camber disponibel, tabata $192.38; un reduccion di 35.4% compara cu e averahe un aña pasa.

Un luna mas leu den e crisis, e proyeccion di AHATA pa recuperacion a bira mas conservativo. Aunke falta hopi informacion ainda pa efectonan di COVID-19 riba mundo, e proyeccion mas conservativo ta pa motibo di bista actual riba e situacion na Merca, e hecho cu menos hende lo biaha prome cu tin vacuna, e efecto financiero di e crisis riba un cantidad grandi di persona mundialmente y e efecto riba aerolinea.  Ta pronostica cu lo experiencia un trayectoria di recuperacion hopi largo, cu siguiente ocupacion pa resto di 2020 (si habri frontera 15 Juni):

	June	July	August	Sept	Oct	Nov	Dec
OCC	5%	10%	10%	10%	20%	30%	40%

E temporada di recuperacion ta un temporada unda gasto ta mas halto cu entrada pa companianan cu ta depende di turismo. E programa gubernamental di subsidio di salario ta un alivio tanten cu e ta disponibel. E realidad ta keda cu e crisis no ta caba dia lockdown caba, pasobra hopi compania na Aruba no por sobrevivi cu entrada di nivel asina abou pa hopi tempo. Varios compania lo tin necesidad di restructura pa por sobrevivi y varios lo mester cera porta.

Cu bista riba reapertura di frontera, AHATA a recomenda rekisito estricto pa yegada di nos bishitantenan pa yuda reduci e cantidad di casonan importa di COVID-19. No ta posibel pa elimina e importacion completamente, pero un reduccion substancial di caso importa lo yuda evita un peso demasiado grandi pa nos sector di salubridad y yuda evita un di dos “lockdown”.