ORANJESTAD, Aruba – 20 di juni 2016: Dia 16 di juni a conmemora World Sea Turtle Day y e comision di medio ambiente di AHATA a celebra e ocasion aki cu un reunion special cu Turtugaruba, cu ta e instancia cu ta conscientisa comunidad tocante proteccion di e turtuganan di lama y nan neishinan. Ademas, Turtugaruba tambe ta percura pa proteha e neishinan y e turtuganan chikito di lama ora cu nan sali di e neishi, te cu nan drenta lama.
World Sea Turtle Day ta un dia pa refleha riba e rol importante di e turtuga di lama den e sistema ecologico. Tur seis turtuga di lama Caribense ta bao menasa y riba e “lista cora” di International Union for Conservation of Nature (IUCN). Cuater di e seis turtuganan Caribense ta traha neishi na Aruba: Leatherback, Loggerhead, Green Turtle y Hawksbill Turtle.
Turtuga di lama ta hunga un rol den mantene lamanan saludabel. Hopi otro especie, incluyendo e ser humano ta depende di e oceannan aki pa nan sobrevivencia. Tin motibonan valido pa conservacion di turtuga.
Durante di un reunion extraordinario di e miembronan di Aruba Hotel and Tourism Association (AHATA) Environmental Committee, Turtugaruba a presenta informacion tocante di e turtuganan di lama di Aruba. A enfoca specialmente riba e miho practicanan cu ta recomenda na e hotelnan y propiedadnan ubica na e beachnan unda cu e turtuganan ta traha nan neishinan.
Conscientisacion ta e prome paso crucial den e proceso di remedia problemanan di medio ambiente. Tur persona of instancia cu a participa na e reunion a mustra hopi interes den e topico y a participa den un discusion positivo tocante di strategianan di mitigacion. Miembro di Parlamento Donny Rasmijn tambe tabata presente durante di e reunion y a duna feedback interesante encuanto di e ley proponi pa cu prohibicion di saco di plastic. Ta di spera cu cahanan di Styrofoam y strawnan di plastic por wordo reemplasa pronto tambe.
Finalmente, e participantenan a bishita un neishi dilanti di Manchebo Beach Resort y otro dilanti Oceania pa haya un splicacion detaya di e medidanan di conservacion cu ta wordo aplica. Tambe nan a haya e oportunidad pa ta testigo di e investigacion cu ta wordo haci riba un neishi di Leatherback, cual a sali e anochi anterior espontaneamente. E boluntarionan a habri e neishi y a colecta data, incluyendo e cantidad di webo, casca di webo, etc. Nan a coba saca tambe cinco turtuga baby cu no a logra sali di e neishi hunto cu nan 88 rumannan e anochi anterior. Net prome cu bahada di solo, e cinco turtuganan baby a haya nan caminda pa e rand di e beach y a landa bay pa lama grandi.
E bista y experiencia di un neishi cu ta sali riba beachnan di Aruba ta algo inolvidabel. Por fabor mantene un distancia for di nan, papia den stem abao y no uza flashlight. E neishinan di turtuga di lama ta marca y identifica pa e baricadanan blanco y cora na Eagle Beach y na otro partinan di Aruba ta uza driftwood. Turtugaruba ta pone un baricada vierkant rond di e neishi y ta suplica tur hende pa no drenta den e areanan marca. Esaki ta prohibi. No core cu vehiculonan manera auto y quadracer riba nos beachnan pa sigura e exito di e neishinan di turtuga. Tur hende hunto por yuda proteha y conserva e animalnan bunita aki. Laga nos proteha naturalesa.
Na september 1965 a funda Aruba Hotel Association y na 1987 a bira Aruba Hotel and Tourism Association (AHATA), cu awendia ta conta cu 90 compania miembro. Su miembresia ta varia for di hotelnan grandi, timeshare, operadornan di tours y companianan grandi y chikito den e sector. E rol primordial di AHATA ta pa proteha, dirigi y influencia e industria turistico di Aruba dor di sigura cu sector publico ta aloca fondonan di “Room Tax” den forma apropia, ta inverti e suma aki efectivamente y ta ehecuta plannan di mercadeo den forma corecto pa aumenta “rev-par” y e suma cu cada turista ta gasta ora ta di bishita riba nos isla.