ORANJESTAD, Aruba – 13 di februari 2017: Desde introduccion di e ley nobo, dia 1 di januari 2017, cu ta prohibi uzo di saconan di plastic, AHATA a crea un campaña di conscientisacion unda ta subi caya pa parti tasnan re uzabel na diferente supermercadonan rond di nos isla. Siman pasa e team di AHATA a bishita supermercadonan na Noord, Paradera y Santa Cruz. E siman aki e esfuerso di conscientisacion a sigui na San Nicolas, Pos Chikito y Madiki.

Vanessa Rasmussen di AHATA a comenta cu nan ta parti tasnan re uzabel cu AHATA a bestel pa e campaña di conscientisacion pa elimina uzo di saconan di plastic. “Ciudadanonan ta bira masha contento ora nos bisa nan cu nos tin un regalo pa nan y nos ta pidi nan pa por fabor sostene e ley y tambe pa nan pensa diferente maneranan pa cuida nos medio ambiente”, asina e ehecutivo di AHATA a agrega.

Supervisor di Macro Supermarket, Mary Yarzagaray, a expresa cu e ta super contento cu e bishita di AHATA y mas ainda ora mira con contento e clientenan ta bira ora nan haya un di a tasnan re uzabel di e organisacion. “Mester proteha e medio ambiente pasobra nos tur ta parti di dje y e ta bon pa nos salud,” el a accentua.

Sra Rosemary cu net a drenta pa haci su compras a haya hopi bon cu a bin cu e ley aki y cu AHATA ta partiendo tasnan re uzabel. “E ta bon pa medio ambiente y e tasnan ta hopi bon calidad y por wordo uza pa hopi otro cos.” Un hoben, Sergio a haya e ley y partimento di tasnan re uzabel hopi bon pasobra e tas ta carga hopi cos. “Saconan di plastic ta mata bestia di lama specialmente e turtuganan”.

Cliente Xiomara Bislip a haya e ley di prohibi uzo di saco di plastic hopi bon pasobra e ta proteha naturalesa. Mas ainda e bestianan – manera burico — cu ta caba ta come e saconan cu ta tira den mondi, ta pak y despues muri. “Nan ta susha naturalesa tambe. E ta un ley cu ta existi hopi tempo caba na otro paisnan. Hopi bon AHATA boso tasnan re uzabel ta di bon calidad cu ta wanta hopi peso”.

Keda pendiente pa e team di AHATA, pa nan siguiente bishitanan den cuadro di e campaña di conscientisacion riba uzo di tasnan re uzabel pa proteha nos medio ambiente.

Na september 1965 a funda Aruba Hotel Association y na 1987 a bira Aruba Hotel and Tourism Association (AHATA), cu awendia ta conta cu 90 compania miembro. Su miembresia ta varia for di hotelnan grandi, timeshare, operadornan di tours y companianan grandi y chikito den e sector. E rol primordial di AHATA ta pa proteha, dirigi y influencia e industria turistico di Aruba dor di sigura cu sector publico ta aloca fondonan di “Room Tax” den forma apropia, ta inverti e suma aki efectivamente y ta ehecuta plannan di mercadeo den forma corecto pa aumenta “rev-par” y e suma cu cada turista ta gasta ora ta di bishita riba nos isla.