ORANJESTAD, Aruba – 6 di December 2018: Aruba Hotel & Tourism Association a organisa un seminario pa tur su miembronan riba e tema di “Sustainable Waste Management”. Aruba ta pasando den un transicion pa un maneho di desperdicio mas sostenibel. Historicamente, tur desperdicio ta descarga na dump di Parkietenbos cual a crea un situacion no sostenibel pa nos isla. Gobierno y instancianan priva ta trahando riba un maneho mas sostenibel pa comunidad. Un maneho responsabel ta trece mas gasto pa nos comunidad. Sinembargo, tin hopi procedura cu por reduci e gastonan substancialmente.

Bucuti &Tara Beach Resort, un miembro di AHATA, ta un gran ehempel di un compania cu a reduci nan gastonan substancialmente cu un maneho sostenibel. Doño di e hotel, Ewald Biemans y su Sustainability Manager, Nathaly Stanley, a  presenta recomendacionnan na miembronan di AHATA durante e seminario.

A sugeri varios paso cu por tuma pa reduccion di gasto y a comparti informacion pa guia e miembronan di AHATA.  A nota hopi interes di miembronan pa hunto analisa con por ta mas responsabel y sostenibel den maneho di desperdicio.

Ta un bon momento pa presenta e informacion aki mientras cu Aruba ta pasando den un cambio grandi, segun Tisa LaSorte, CEO di AHATA, pa companianan por siña mas tocante un maneho responsabel y reduci e gastonan di desperdicio.

E miembronan presente a keda satisfecho cu presentacion di Bucuti & Tara Beach Resort, cu tambe ta miembro di AHATA. Bucuti & Tara Beach Resort ta un hotel cu a gana hopi premio pa nan practica sostenibel y recientemente a reduci nan “carbon footprint” na cero.

AHATA ta promove pa nos tur bira mas sostenibel den nos maneho, incluyendo esun di desperdicio.