Pa por yuda damnificadonan na Isla Riba

ORANJESTAD, Aruba – 20 di September 2017: E ta di admira e manera con comunidad ta ofrece ayudo na nos islanan ruman St. Maarten, Saba y St. Eustatius. Horcan Irma a pasa den nos region y a afecta St. Maarten y otro islanan masha hopi. Aruba Hotel & Tourism Association (AHATA) ta coopera den diferente forma pa trece alivio por ehempel na turistanan cu a bini Aruba, pa nan por sigui pa nan pais. Partnernan ta hopi atento cu e situacion y ta yuda no solamente cu donacion, pero tambe a coopera cu individuonan y famianan cu camber mientras ta warda avion pa hiba nan cas.

Awe AHATA a acerca Cruz Cora pa asina contribui cu productonan di prome necesidad cu ta asina necesario na nos islanan ruman, manera caha di boter di awa, bruki den diferente size for di 0 te cu 5, juice special pa mucha, cuminda pa baby, lechi pa baby y varios otro producto di prome necesidad cu den e momento aki ta hopi scars na Sint Maarten. Ta pidi comunidad pa por fabor sigui contribui cu Cruz Cora, gruponan y diferente instancia cu den un of otro manera nan ta duna un man na Isla Riba.

Durante nos bishita na Cruz Cora a indica cu e siguiente productonan ta hopi necesario pa asina nan por traha e “basic emergency food package”: Oatmeal, lechi, koffie, te, sucu, salo, cereal, jam, pindakaas, keshi smeer, tuna di bleki, sardinchi, soseishi, potted-ham, corned beef, spam, pasta di bleki, hash, nutella, aros, pasta, macaroni & cheese, sopi continental, azeta pa cushina, buscuchi, nutricional bars, boter pa baby, baby food, baby cereal y lechi pa baby, pamper pa baby, habon pa baby, baby oil, baby cream, baby shampoo, baby powder. Tambe mester di productonan pa cas, manera papel di WC, pasta di djente, skeiro di djente, habon pa baña, wipes, plato, bowl, cups cold, forki, cuchara y cuchiu di plastic.