A celebra vuelo inaugural di Aruba Airlines, Inversionnan grandi na Aeropuerto ta precisamente pa por maneha e demanda

ORANJESTAD, Aruba – December 2015: “Nos ta convenci cu Aruba Airlines ta un bon partner den cual e industria di aviacion na Aruba lo sigui crece y desaroya den e añanan nos dilanti”, asina James Fazzio, Chief Executive Officer di Aruba Airport Authority N.V. a duna di conoce diaranson mainta na ocasion di celebracion di e prome vuelo comercial di e aerolinea for di Aruba pa Corsou y Republica Dominicana. Den su discurso, e director di Aeropuerto Internacional Reina Beatrix a considera aña 2015 como uno remarcabel pa Aruba Airlines, den cual e aerolinea a introduci rutanan nobo y cu gran exito. Desaroyo y expansion di aeropuerto ta depende, entre otro, di e crecemento di e aerolineanan local. Contrario na esunnan stranhero, e avionnan di companianan local mayoria bes ta drumi na cas, como tal mester crea suficiente espacio pa por acomoda nan riba rampa.

Ora referi na inversion di mas cu 150 miyon dollar den e añanan nos dilanti, ta pa por prepara e edificio pa maneha un fluho adicional di pasahero cu aerolineanan ta treciendo nos isla. Y den esaki sin duda cu e aerolineanan local ta hunga un rol primordial. Ta precisamente esaki ta e motibo tambe cu aeropuerto ta sigui inverti, sigui innova y sigui amplia su facilidadnan, tanto pa acomoda mas avion como tambe pa por maneha mas pasahero. Aruba Airlines, bulando cu su avionnan nobo Airbus A-320 cu ta carga 150 pasahero sinta comodo lo sali 8:15am for di Aruba pa Corsou cu vuelo AG-501 y ta sigui 9:30am for di Corsou pa Republica Dominicana y sali bek 2:30pm pa Corsou y 4:15pm ta bula for di Corsou pa Aruba.

Pa mas di un aña no tabatin competencia riba e ruta Aruba – Corsou pa cual e vuelo nobo aki sin duda lo beneficia pasaheronan, tanto den tarifa, den opcion di orario y den cantidad di stoel disponibel. Tanto e mercado di Corsou como esun di Republica Dominicana ta importante pa Aruba, sea pa bishitanan di famia, pa eventonan of djis pa pasa algun dia di vakantie. Aruba Airport Authority N.V., trahando den relacion estrecho cu Schiphol Group, ta maneha un aeropuerto moderno y eficiente, cu tres diferente edificio cu hunto ta forma e terminal. Nos Aeropuerto ta conta cu 66 ticket counters, oficina pa aerolinea nan y centro di compras pa pasaheronan biahando pa Merca y pa otro destinacionnan. Nos ta un di e poco paisnan na mundo cu tin presencia di e facilidad di U.S. C.B.P, esta Inmigracion y Aduana Mericano riba nos isla, pa facilita pasaheronan y “pre-clear” vuelonan prome cu nan yega Merca.

Na aña 2014, aeropuerto di Aruba a maneha mas di 2.5 miyon pasahero, cu a encera un crecemento di mas di 10% compara cu e aña prome. Pa e aña aki, Aruba Airport Authority N.V. ta premira di lo sigui crece, tanto den cantidad di vuelonan y cantidad di pasaheronan cu ta pasa dor di e terminal.