Aruba ta conta cu 139 mil stoel adicional den e lunanan nos dilanti Pa e temporada di “high season”

ORANJESTAD, Aruba – November 2015: “Nos di Aeropuerto di Aruba ta satisfecho cu e pronostico pa loke ta capacidad pa Aruba den e periodo venidero di Winter”, asina Jo-Anne Arends, encarga cu e seccion di “Airline Marketing” na Aruba Airport Authority a duna di conoce. E ehecutivo di aeropuerto ta bisa esaki pasobra ta premira un crecemento record atrobe, den cual lo aumenta e cantidad di stoelnan disponibel pa Aruba den forma historico! Aerolinea nan ta categorisa dos periodo di “scheduling” den un aña, cu ta e periodo di zomer y winter. Ta considera e lunanan November te cu fin di Maart como e periodo di winter. Esaki ta cay net tambe como e periodo cu nos na Aruba ta considera nos “High Season” den turismo. Pa e periodo specifico aki, Aeropuerto di Aruba ta premira un crecemento total di 16% den capacidad di stoel disponibel pa nos isla, cu ta ekivalente na un total di 139 mil stoel adicional! Pa nos mercado principal di Merca, ta premira un crecemento di 4% pa Aruba.

E crecemento aki ta un combinacion di capacidad adicional di nos partnernan local, Aruba Airlines y Insel Air Aruba, pero specialmente di otro partnernan Mericano manera United y American Airlines cu vuelonan adicional of cu a aloca avionnan mas grandi  di for di destinacionnan manera Newark, Houston y Charlotte. Tambe Southwest Airlines cu vuelonan di Houston cu ta conecta e parti West di Merca cu Aruba, como parti di nos plan strategico pa atrae turistanan afluente  for di mercadonan diferente. Pa loke ta encera e di dos region principal, esta Latino America, excluyendo e crecemento den capacidad di Venezuela, tambe por mira cambionan den “connecting time” for di e dos hubnan principal cu ta Bogota y Panama. E cambionan aki ta pa aumenta trafico aereo for di e mercadonan principal manera Colombia mes, Chile, Argentina y Brazil.

E mercado di Europa lo mantene e cantidad di vuelonan di KLM y Arkefly/Tui Group. Si lo tin vuelonan charter adicional for di Inglatera, specificamente for di Manchester y London Gatwick. “Mi kier a agrega cu dos siman pasa hunto cu un delegacion consistiendo di ATA, AHATA, Ministerio di Turismo y Aruba Airport Authority, nos a tene reunionnan masha fructifero cu tur nos aerolinea nan partner na Merca. For di e encuentronan aki por conclui cu tur aerolinea ta hopi satisfecho cu e resultadonan riba e rutanan pa Aruba y ta premira un aña 2016 cu miho resultado cu 2015”, asina Jo-Anne Arends a enfatisa. Cu e realidad aki riba mesa, Aruba Airport Authority awor a cuminsa prepara internamente pa e temporada druk cu ta drentando den December y cu lo sigui te cu fin di Maart, den cual lo tin mas avion, mas vuelo y mas capacidad pa nos isla. Esey riba su mes ta trece un presion den operacion na nos aeropuerto, pa maneha tanto avion como pasahero. Sinembargo, Aruba Airport Authority ta sigura cu mes tanto esfuerso cu ta hinca den atrae aerolinea nobo y pa aumenta capacidad di asiento disponibel, mes cantidad di esfuerso tambe ta hinca na inversion den ekipo humano y forma moderno pa promove mas eficiencia den maneho di fluho di pasahero.

Aruba Airport Authority N.V., trahando den relacion estrecho cu Schiphol Group, ta maneha un aeropuerto moderno y eficiente, cu tres diferente edificio cu hunto ta forma e terminal. Nos Aeropuerto ta conta cu 66 ticket counters, oficina pa aerolinea nan y centro di compras pa pasaheronan biahando pa Merca y pa otro destinacionnan. Nos ta un di e poco paisnan na mundo cu tin presencia di e facilidad di U.S. C.B.P, esta Inmigracion y Aduana Mericano riba nos isla, pa facilita pasaheronan y “pre-clear” vuelonan prome cu nan yega Merca. Na aña 2014, aeropuerto di Aruba a maneha mas di 2.5 miyon pasahero, cu a encera un crecemento di mas di 10% compara cu e aña prome. Pa e aña aki, Aruba Airport Authority N.V. ta premira di lo sigui crece, tanto den cantidad di vuelonan y cantidad di pasaheronan cu ta pasa dor di e terminal.