WILLEMSTAD, CURAÇAO – ACOYA Hotel, Suites & Villas a drenta e último fase di konstrukshon i ta plania pa yama bon biní na su promé huéspetnan den e promé kuartal di 2014. Pa motibu di su eksperensia amplio den industria turístiko i un lista largu di logro komo CEO di Curaçao Tourism Board, a invitá Sr. Ghatim Kabbara pa enkabesá e tim di profeshonalnan ku lo ta enkargá ku strategianan den Sales & Marketing i asina sigui desaroyá e resort. Ademas di Sr. Kabbara, Sr. Henry Martijn tambe ta djòin e ekipo di maneho komo Sales Manager di e resort. Su amplio eksperensia den industria di hospitalidat i desaroyo turístiko sigur lo ta na bentaha di e proyekto. “Mi ta hopi kontentu di por kolaborá ku un proyekto asina prestigioso i ambisioso,” esaki di akuerdo ku Sr. Ghatim Kabbara, Head of Business Development pa ACOYA Hotel, Suites & Villas. “ACOYA ta representá e nivel di sofistikashon ku ta posibel den sektor di turismo na Kòrsou. E ta e meskla perfekto entre akomodashon di kalidat ku un ubikashon sentral  na un preis razonabel.” ACOYA Hotel, Suites & Villas tin komo meta pa satisfasé e demanda kresiente di operadornan di tour pa resortnan ku ta ‘quality-focused’ pero ku un kultura di servisio haltu. Ademas di Studios ku kambernan grandi i Suites ku bista riba pisina i lagun ACOYA Hotel, Suites & Villas, lo ofresé su huéspetnan un restorant i un Business Lounge; un pisina ku tres diferente nivel; peska i aktividatnan akuátiko na e lagun; un sentro di buseo 5 strea; Wellness Center i Spa i tambe un French Style Bakery ku lo ofresé platonan gourmet i otro delisia. Propietario di ACOYA Hotel, Suites & Villas, Sr. Mahesh Daswani, ta yama e ekipo di maneho bon bini bisando: “Nos a bin ta desaroyá e proyekto aki pa algun aña kaba i nos tin hopi espektativa pa e dia riba kual nos lo por ofresé nos servisionan na e huéspetnan. Mi ta kere esaki ta e mihó tempu pa inisiá un resort nobo, pa motibu ku e lo generá negoshi pa e isla i duna un empuhe na industria turístiko. Mi vishon pa ACOYA ta ku e lo por bira un éksito i inspirá mas hende pa invertí den Kòrsou.”