Willemstad – Djamars atardi dia 21 di Yüli tim di negosashon di Curaçao Airport Partners i di sindikato ABVO a reuní ku otro i firma CAO di CAP. “Mi ta sumamente gradisí na tur esnan ku tabata parti di negosashonnan pa yega na nos CAO. Laga nos sigui pa dilanti i traha riba desaroyonan na CAP i na aeropuerto”, tabata e mensahe di CEO di CAP señor Ralph Blanchard durante e momentu ofishal.

Después di un periodo di negosashon di 16 luna ABVO i CAP a yega na un akuerdo pa ku e CAO di e kompania (Akuerdo Laboral Kolektivo). E CAO ta konta pa un periodo di 2015 te ku 2020. Presidente di ABVO señor Wendy Calmes i CEO di CAP señor Ralph Blanchard a firma e akuerdo laboral den presensha di miembronan di grupo di servisio i di bestür di ABVO i miembronan di gerensha i tim di negosashon di CAP. Presidente di ABVO Wendy Calmes a gradisí e miembronan di grupo di servisio di ABVO pa nan esfuersonan durante e periodo di negosashon. “Mi ta spera ku nos miembronan tambe ta satisfecho ku lokual nos a akordá awe”, Calmes a bisa.
“Mi sa ku tabatin momentunan difisil durante e negosashon, pero nos a siña di otro durante e proseso i esei a resultá den e hecho ku nos a finalisá un CAO ku ta sirbi tantu e nesesidatnan di e empleadonan i di e kompania. Nos ta realmente kontentu di por ofresé empleadonan di CAP un akuerdo laboral ku ta kumpli ku nan aktual nesesidat i ta establesé un plataforma ku ta sigurá seguridat di empleo a largo plaso”, Ralph Blanchard a bisa.