Willemstad – Resientemente Fundashon JAG a organisá un rueda di prensa, den kual nan a duna diferente informashon relatá na e di 50 edishon di Kòrsou su karnaval. Un temporada ku sigur ta pinta di bira unu ku bastante reto pero alabes un temporada sumamente eksitoso. Netamente esaki ta e motibu den kual e komishon organisadó di Festival di Tumba Hubenil, ku tin e konosido kantante Heinrich Pieter na kabes, ya ta en buska di e futuro Rei òf Reina di Tumba Hubenil.

E komishon ku ta konsistí di hóbennan dinámiko, profeshonal i talentoso ta di opinion ku pueblo di Kòrsou mester bira aun mas konsiente di kuantu potensial nos muchanan tin. P’esei nan enfoke ta pa organisá un festival di hóben pa hóben, kaminda grandi i chikí por disfrutá di e kalidat i potensial di nos tumberonan. E vishon di e plataforma aki i eksperensianan ku nos tumberonan lo atkerí, sigur lo ta garantia pa nos karnaval por sigui bria den futuro.

Hóben, si bo ta mira bo mes komo e futuro Rei òf Reina di Tumba Hubenil i bo tin entre 9 pa 15 aña di edat? Inskribí awe mes i forma parti di e aventura karnavalesko aki.

Pa inskribí ta fásil. Subi e página di Facebook: Tumba Hubenil Kòrsou i yena e formulario di inskripshon. Tambe por manda un mail na tumbahubenil2020@gmail.com i pidi e formulario. Si bo tin kualke pregunta, por hasi esaki libremente na number di telefòn +5999 529-5216. Tene na kuenta ku por inskribí te ku djamars 29 di òktober 2019.