Durante conferencia ANATO a reuni cu operadornan, aerolineanan y prensa

ORANJESTAD, Aruba – E siman aki a tuma luga na Bogota, Colombia e conferencia pa profesionalnan den e ramo di turismo di ANATO (Asociacion Colombiana de Agencias de Viajes y Turismo).

E asina yama Vitrina Turistica -actualmente den su 35 edicion annual- tabata anfitrion pa representante di companianan cu ta bende viahe, aerolineanan, hotelnan, oficinanan di turismo etc., di e mercadonan den e continente di ‘The Americas’ cu ta participa den e industria turistico en general.

Ademas di atende e conferencia pa promove Aruba, CEO di Aruba Tourism Authority, Ronella Tjin Asjoe-Croes, Chief Marketing Officer di A.T.A., Sanju Luidens-Daryanani, Miriam Dabian, Director A.T.A. Latino America basa na Bogota, y Maria Victoria Galan, Director di A.T.A. Colombia a tene diferente reunion y encuentro importante. Jerusha Rasmijn, Gerente pa Aruba Convention Bureau, tambe a sostene reunionnan clave, y por bisa cu na varios reunion e equipo di A.T.A. a wordo acompania dor di Jo-Anne Arends, Head Airline Marketing di AAA.

E delegacion a probecha pa organisa un reunion cu A.T.A. Colombia y representantenan di hotelnan di Aruba pa un ‘review’ di e periodo cu a pasa y pa discuti diferente aspecto crucial, entre otro trendnan di e mercado Colombiano cu a conoce su retonan cu e cambio no favorabel di dollar Mericano durante di 2015. Tambe a revisa diferente aspecto clave pa e mercado di Latino America. A discuti tambe e conferencia CATA 2016, unda cu Aruba ta invita socionan clave cu ta bende Aruba como destinacion pa bin nos isla pa ricibi ‘updates’ di e productonan y servicionan disponibel, y negocia cu partnernan local. E aña aki, CATA lo tuma luga durante luna di April.

Un di e reunionnan sumamente importante tabata e reunion cu operadornan cu ta bende Aruba (wholesaler/tour operators) den e mercado Colombiano. Aki no obstante dificultadnan den e mercado ta indica cu, cu e esfuerso necesario, e Colombiano lo sigui biaha y cu e situacion mas grave (cambio di e dollar Mericano) a tuma luga na aña 2015 y ta premira un aña 2016 cu retonan pero tambe cu mehoracion, mirando cu e Colombiano ta simplemente custumbra cu e balor nobo di e peso contra e dollar Mericano. Mester tene cuenta cu e ultimo aspecto aki a haci pasashinan 4.5% mas caro y paketenan pa un vacacion 25% mas caro pa e Colombiano.

Pa Aruba e mercado Colombiano a confronta reto den 2015, manera por bisa ta e caso ‘across the board’. Aruba a conoce un bahada di 13% for di e mercado aki, pero si por mira un shift exitoso desde eliminacion di e visa na comienso di december aña pasa. Aki por nota cu e mercado a crece cu 20% na december y cu 26% na januari. E meta agresivo pa Aruba pa e aña aki ta un crecemento di 30% for di e mercado aki.

Aerolinea partner di Aruba na Colombia, entre otro Avianca, COPA, LAN y Insel Air Aruba ta hunga un papel cardinal den e mercado aki, como tambe den varios otro mercado. A reuni extensamente cu LAN pa continua conversacionnan clave referente servicio aereo y mercadeo. Aki a reuni cu Fernando Poitevin-Presidente, Juan Manuel Perez-Director de Ventas, y Andres Penuela-Gerente Regional Ventas. Un reunion por bisa sumamente fructifero unda a acorda pasonan clave pa ambos partido.

Tambe a reuni extensamente cu Avianca, unda cu a reuni cu entre otro e vice presidente comercial, Carlos Duran Cuello, Juan Ricardo Castillo-director di bentanan internacional, Roman Joya-Gerente Global de Turismo, y Clara Ricaurte-Administracion de Comunicaciones y Alianzas con Organizaciones de Turismo. A acorda pasonan comercial nobo cu lo lansa e aña aki pa cu Colombia y a acorda pasonan pa Latino America.

Ehecutivonan di A.T.A. y A.A.A. a reuni cu Karla Guillen-gerente di mayoristanan, convencionnan y charternan, y Efrain Tapage, kende ta coordinador di actividadnan di turismo di Copa Airlines, un di Aruba su partnernan clave pa cu turismo for di Latino America en general. Aki a enfoca riba topico di mercadeo pa e region di Latino America. Presente tabata tambe Gustavo Esusy-gerente regional Mercosur, Diego Bermudez Parra-regional manager Near South America, Efrain Tapage Mora-Tourism Authorities & Strategic Partners Coordinator y diferente otro ehecutivonan di Copa Airlines.

Insel Air Aruba a sostene varios combersacion, unda cu a comparti plannan pa cu e mercado di Colombia y a ricibi un update di e situacion actual di Tita Iglesias, Commercial Manager na Insel Air Aruba. Tambe a reuni cu Avior Airlines su vice-presidente di comercializacion, Gibson Preziuso Urbaneja, y a discuti e mercado di Venezuela, pero tambe e mercado Colombiano den termino di aviacion.

E Vitrina Turistica, ANATO 2016 a resulta un biaha mas den un exito rotundo pa nos isla.

Aruba a conta cu participacion di mas di 16 socionan local cu a probecha pa haci negoshi cu e mercado Colombiano y Latino Americano. Tambe a sostene reunionan clave, bou di liderazgo di Jerusha Rasmijn cu clientenan potencial pa e negoshi MICE (Meetings Incentives Conferences and Events). Esaki ta un segmento cu Aruba ta pushando extra e aña aki.

E booth di Aruba tabata hopi bon bishita y e atencion cu e delegacion a ricibi for di medionan di comunicacion a logra un cobertura excelente di tur loke Aruba tin di ofrece su bishitantenan, principalmente enfocando riba noticianan / updates