Celebrando su prome 5 añanan di existencia

ORANJESTAD, Aruba – 15 di januari 2016: Gobiernonan pa e ultimo 25 añanan a papia di independisa Aruba Tourism Authority y 1 di januari 2011 a logra esaki, ora cu a crea Aruba Tourism Authority Sui Generis cu e meta pa habri mas oportunidad pa desaroya turismo pa nos isla, pero tambe pa conta cu un modelo solido unda por maneha turismo na un manera mas agil, eficaz y duradero. Esaki ta cardinal mirando e importancia di turismo pa nos economia y nos pais den su totalidad! Despues di evalua e resultadonan di e ultimo 5 añanan, por bisa cu esaki tabata un di e miho decisionnan tuma, y cu awe por mira bek na un industria turistico, cu reto, pero solido y uno cu a sabi di carga nos pais debidamente!

Na aña 2011, apenas e prome aña di existencia di Aruba Tourism Authority den su structura nobo, como Sui Generis, mientras a pronostica un aumento di 3% den cantidad di yegada di turistanan, Aruba a yama bon bini na 868,973 bishitante, cu a representa un aumento di 5.7%. E cantidad di turistanan crucero a aumenta cu 5.4% mescos ta e ‘tourism receipts’ cu tambe a subi cu 8.0%. Aña 2011 tabata uno di transicion y ‘set up’ pa A.T.A. como entidad independiente, unda cu hopi esfuerso a bay den e parti organisatorio incluyendo atencion na personal y organisacion administrativo, y banda di esaki a cuminsa introduci cambionan riba nivel di mercadeo mientras cu a sigura cu resultadonan ta positivo. Tambe A.T.A. a introduci su evento anual den cuadro di Dia Internacional di Turismo y a yama bonbini na e promer Hunta di Supervision pa A.T.A. Sui Generis.

Na aña 2012, mientras a pronostica un crecemento atrobe di 3%, a logra hisa e cifra te cu 4.0%. E aña ey tabatin algun luna cu a kibra tur record, manera tabata december 2012 cu un crecemento di 11.0%, haciendo esey e miho december den henter historia turistico di nos isla. AHATA a anuncia aumento di 6.8% den RevPar, mientras Banco Central a anuncia aumento den ‘tourism receipts’ di 3.8%. Turismo crucero a confronta poco reto y a registra un caida den pasahero di 2.9%. Aña 2012 a sigui di ta uno di transicion como tambe cambionan importante. Ta bon pa menciona cu na augustus 2012 a introduci e ‘Travel Promotion Levy’ den cual ta cobra $10.- riba tur pasashi cumpra pa bishita Aruba. Tambe a cambia e agencia di ‘PR’ y ‘advertising’ na Merca, a habri e mercado di Chile y a lansa ‘Mi Compromiso’.

Aña 2013 a bira un aña record, cu no menos di 8.3% di crecemento den cantidad di turistanan cu a bishita Aruba, crecemento di 6.6% den ‘tourism receipts’, crecemento di 18.2% den turismo crucero. AHATA a anuncia crecemento di 0.3% den RevPar. Mester bisa cu na 2013, mientras Aruba a crece cu 8.3% den cantidad di turistanan, Caribe a crece cu 2.8% y mundialmente turismo a crece cu 4.6%. Ta bale la pena menciona cu na aña 2013, Aruba a gana no menos di 13 diferente premio. A.T.A. mes a gana 2 premio, un na Argentina como e di tres luga den ‘Best Marketed International Destinations next to Cuba and USA’. E otro premio tabata na Hulanda unda A.T.A. Europa a gana e di tres premio como e miho ‘Tourist Board’. Durante di 2013 a inicia e trayecto di produccion di e di dos ‘Business Plan’ pa A.T.A., a cera e prome CAO di A.T.A. y a lansa aruba.com completamente rediseña.

Aña 2014 tabata un aña pa celebra, cu un record den cantidad di turistanan di estadia yegando nos isla, un total di 1.07 miyon turista! Na tur ta papia di un aumento di 9.5%. E resultado di aña 2014 ta representa un aumento di 73% den ‘tourism receipts’ y un aumento drastico di 19.3% den RevPar. Turismo crucero a confronta poco reto y a registra un caida den pasahero di 3.1%. E aña aki a conoce introduccion di Southwest Airlines y LAN, a completa A.T.A. su ‘Business Plan’ pa e periodo di 2014 pa 2017 y A.T.A. a inicia un etapa nobo unda ta inverti den nos producto turistico. “Cruise Symposium Aruba” ta parti di inisiativanan cu a tuma lugar na 2014, como tambe introduccion di audotiria finansiero interno a base mensual na A.T.A.

Pa loke ta aña 2015, ainda e cifranan revisa no ta cla. Por cuminsa bisa si cu e cantidad di turista cu a yega nos isla via avion ta representa un aumento di 15% te cu november, compara cu aña 2014. Te cu tercer cuartal di 2015 ‘tourism receipts’ a conoce un aumento di 3.8%, mientras cu RevPar a conoce un aumento di 2.3% den aña 2015. Den turismo crucero aña 2015 no tabata nos miho aña y a confronta poco reto cu cancelacion di barconan cu a pone cu a cera aña cu 607.019 pasahero crucero cu ta un caida di 9.0%. Ta bon pa agrega cu aña 2016 ta mustra mucho mas miho, cu 336 barco biniendo cu aproximadamente 658.944 pasahero cu lo representa 8.6% di crecemento compara cu 2015. E caida aña pasa ta debi na cancelacion di e crucero Gemini di Sterling Cruises y e falta di Pullmantur durante temporada di zomer, pasobra nan a manda e barco Mexico. Aña pasa a lansa ‘Duna Aruba e Miho di Bo’ y aña pasa atrobe tabata uno di diferente premiacion entre otro. E ‘National Geographic World Legacy Award for Destination Leadership’. E departamento nobo di ‘Destination Services’ tambe a wordo establesi e aña aki, Aruba Convention Bureau a celebra 20 aña di existencia, a inicia trayecto di maneho pa cu ‘All Inclusive’ y tambe a ahusta legislacion di A.T.A. hacienda posibel cu resultado nan ‘netto’ por wordo transferi pa gobierno.

Ta obvio cu e prome 5 añanan di Aruba Tourism Authority Sui Generis tabata exitoso. For di 2011 A.T.A. a entrega su presupuesto y ‘Annual Report’ mara na un auditoria financiero di e organisacion pa un compania di accounting independiente, na tempo cumpliendo asina cu locual ley ta prescribi pa maneho di A.T.A. Sui Generis.

Aruba Tourism Authority (A.T.A.) ta un organizacion dinamico encarga cu mercadeo y maneho di Turismo di Aruba. A.T.A. continuamente ta inicia proyectonan nobo, alinea cu A.T.A. su plan strategico y conforme maneho stipula pa turismo di Aruba. Puntonan di enfoke clave ta inclui enfoca riba atraccion di e biahero afluente, aumenta e averahe di loke e turistanan ta gasta pa dia, diversifica mercadonan y sigura ‘airlift’ adecua pa asina ricibi tur e bishitantenan desea. Inovacion, creatividad y enfoke riba e efectividad (maximaliza cada dollar cu ta wordo inverti) ta keda punto importante, a base continuo, y ta sirbi como base pa varios reconocimentonan prestigioso cu Aruba a bin ta gana recientemente.

E exito di A.T.A. Sui Generis ta danki na liderazgo fuerte di Ministro di Turismo, Hunta di Supervision, e CEO, equipo di maneho, empleadonan laborando localmente e internacionalmente, socionan como tambe na esnan cu a crea e fundeshi solido pa cu Aruba su turismo y A.T.A. durante añanan anterior na 2011.