WILLEMSTAD – Por ta e no ta mes grandi ku e palu di Pasku inmenso ku otro siman pa tradishon den un ambiente festivo nan ta bai sende su lusnan den Rockefeller Center den sentro di New York City, pero e palu di Pasku gigantesko den e paraiso di kompra Sambil tambe ta konta. Ohalá lo por denominá e suseso aki na analogia di e New York komo e inisio ofisial di e temporada di fiestanan di fin di aña na Kòrsou.

Ku un interes públiko grandi djaweps anochi a sende e lusnan den e pal’i Pasku grandi den Food Court di Sambil. Ora a paga tur lus den e feria di kuminda, a kuminsá konta di 10 pa 0 pa por a sende e lusnan di Pasku den e palu grandi. E momento festivo aki ta bai kombiná ku un programa ekstenso di aktividat, manera presentashon di un kor di mucha ‘D’art Dance Group i tambe e pianista Tico Roberto ku ta kompañá e kantante Jill Frans (den ‘sneu’) pa e diferente piesanan di Pasku ku a brinda. Komo sorpresa pa tur hende e anochi ei Efrem J. tambe a duna un presentashon. Papa Pasku tampoko no por a keda afó naturalmente banda di e palu grandi.

E lusnan dekorativo aki di Pasku lo keda sende te fin di e promé siman di yanüari 2017. Ta bon pa kòrda tambe ku djasabra awor, meskos ku a sosodé aña pasá pa promé be, San Nikolas i su ayudantenan kolorido riba e promé dia ku nan a toka suela di Kòrsou lo bishitá Sambil ku hopi sorpresa pa e muchanan.