WILLEMSTAD – Despues ku djaweps e sentro di kompra Sambil na Veeris a habri su portanan pa promé biaha pa e públiko grandi, gerensia di Sambil i famia Cohen a risibí wéspet spesial i prensa pa un selebrashon chikitu pa e okashon aki. Atrobe e sentro di kompra a habri for di 10 or di mainta pa públiko. Meskos ku riba e promé dia hopi hende no por a wanta nan kuriosidat i a bai tira un bista na e atrakshon nobo aki di Kòrsou. Banda di mitar di 2 e invitadonan spesial a kuminsá yega na e entrada yamá Barbara Beach kaminda miembronan di staf di Sambil i di famia Cohen a risibí nan. Den fondo Marco Dorothea tabata toka harpa miéntras ku tabata ofresé e wéspetnan un bebida di bonbiní. Presente tabata tambe vise promé minister Etienne van der Horst i minister Stanley Palm di turismo i desaroyo ekonómiko.

Aniversario

Ku Sambil Curaçao a habri su portanan riba 28 di mei, tabata algu masha spesial pa e famia. Riba e dia ei señor Salomon Cohen, fundadó di e kompania mama Constructora Sambil, a selebrá su di 88 aniversario. Tradishonalmente e dia ei henter famia, mientrastantu den e di kuater generashon, ta bini huntu pa selebrá e kumpleaño di e pater familias na grandi na su kas na Caracas. P’esei djaweps tabatin un grupo masha chikitu di miembro di famia presente ora Sambil a habri aki. Djabièrnè un delegashon di famia a bini for di Venezuela i otro kaminda pa selebrá e kuminsamentu di Sambil Curaçao, e di dies den un seri di sentro di kompra.

Djis despues di 2 or e músika a para i tabata ora pa e akto simbóliko. Tabata toka na e yu muhé mayó Fanny Cohen pa huntu ku su ruman Alfredo i un grupo di subrino ranka e sinta kibra den presensia di otro miembronan di famia, e dos ministernan i e sobrá wéspetnan. For di aya e wéspetnan a sigui e famia i e mandatarionan den e gangnan na e food court meimei di e kompleho. Aya e pianista Gino Coelho a perkurá pa e parti musikal, miéntras ku Café Barista a sirbi kos di bebe i pasapalu.

Hasiendo uso di e oportunidat señor Alfredo Cohen a hiba palabra na nòmber di famia. El a gradisí tur pa nan presensia, pero tambe tur ku a kontribuí na realisashon di e proyekto di un tamaño grandi asina den apénas tres aña. El a bisa ku asina un soño di famia tambe a bira realidat, un proyekto mionario nobo ku lo nifiká un push enorme pa ekonomia, ku lo krea mas ku 2000 puesto nobo di trabou i ku ta introdusí un konsepto nobo na Kòrsou. El a gradisí masha spesífiko tambe e pueblo di Kòrsou pa nan sosten grandioso for di inisio di e konstrukshon na 2012. Ademas a mustra riba un pantaya grandi imágennan di e apertura di un dia anterior i di e mensahe ku Sambil he hiba mas lei den direkshon di un Kòrsou pa futuro.

Despues ku e resepshon aki a kaba mitar di 4, e wéspetnan mes por a kana rònt i hasi kompra den e sentro. Nan por a bai tira un bista tambe den e salanan di e teater di Cinemark den Sambil ku for di mitar di 6 di atardi a kuminsá ku su promé funshonnan di sine.