Brouwerij Nacional Balashi ta orguyoso di su cerbes nobo

ORANJESTAD, Aruba – 4 di december 2016: Desde algun luna caba, e ekipo di expertonan di cerbes na Brouwerij Nacional Balashi ta den preparacion pa un receta nobo, un cerbes nobo, cu un sabor nobo pa ofrece un experencia nobo. Den esey a tene cuenta cu tur aspecto pa ofrece un tipo di cerbes diferente riba mercado local y asina a yega na e concepto nobo cu a haya e nomber di “Hopi Bon”.

E percepcion di Hopi Bon ta pa consumidornan percibi e producto como un cerbes Caribense pero di calidad mundial, cu ta tanto inspirativo como relevante pa e consumidor. Hopi Bon ta un cerbes perfecto pa disfruta di dje na miho luganan y durante e miho momentonan.

Brouwerij Nacional Balashi a diseña un logo special cu ta bin compaña pa un mascota, den forma di un yuwana berde, den cual ta enfoca riba e ingredientenan y e diseñonan di indjan cu nos por aprecia den grotnan na Aruba. Claro cu esey ta pa subraya e base di e cerbes, esta Caribe, cu ta habri porta pa exportacion di e producto local. Hopi Bon ta un “premium beer” y ta bini den un boter color bruin di 22cl, cu e producto fresco prepara na Aruba mes, pues sin necesidad pa añadi aditivonan pa ora di exportacion. Mas ainda, ta paga statiegeld riba e boter ora di entreg’e, den un esfuerso pa evita cu ta deshaci di e boter sin mas.

Desde siman pasa e cerbes a subi caya caba, adelantando su lansamento oficial. E reaccionnan ta masha positivo mes caba y e conocedonan di cerbes ta considera cu tabata falta un cerbes di e calidad aki riba nos isla. Tropical Bottling Company a cuminsa opera oficialmente na aña 1949 mientras cu a lansa cerbes Balashi na aña 1999 for di unda a funda tambe Brouwerij Nacional Balashi.