WILLEMSTAD – Na ofisina di Sambil na Veeris a firma e konvenio pa e lugá pa stashoná outo di e kompleho Sambil Curaçao bai sirbi komo sitio pa e magno evento musikal Viva La Música Latina Curaçao 2015, programá pa dianan 29 & 30 di Mei próksimo. Di parti di Sambil gerente general Jonathan Cohen a firma i Stephen Hudson pa Showbizz International. Di e forma akí tambe, ya ta 100% garantisá ku e promé edishon di e evento musikal latino akí ta tuma lugá riba tereno di Sambil. De paso, ta bon pa menshoná ku ta bira tambe e promé evento grandi ku lo tuma lugá na Sambil.

Espektákulo

Pa Sambil, e proyekto akí ta sirbi pa den un tiru, duna míles di hende oportunidat pa sinti sabor di e sentro komersial mes komo tal. Por sierto, ta balapena menshoná ku e ora ei Sambil ta habrí kaba pa algun tempu i su tiendanan tambe lo por ta habrí riba e anochinan di e konsierto. Tantu señor Cohen komo señor Hudson a duna nan palabra ku tur dos partido lo traha duru pa garantisá un tremendo espektákulo, sigur teniendo na kuenta ku pa e dos anochinan di e konsierto ta spera un gran kantidat di turista spesialmente for di pais latino manera Venezuela, Colombia, Puerto Rico, Repúblika Dominikano, Panamá i ta klaro tambe di Aruba, Boneiru i Sürnam ku ya ta reservando entrada pa e gran evento musikal akí.

Otro kos grandi

Den pasado Showbizz (Stùntman) a bini ku diferente primisia pa loke ta lugá kaminda nan a monta espektákulo internashonal di gran magnitut. Tur hende por kòrda kon Stùntman a kue un lugá di stashonamentu dilanti SDK pa koba un buraku i monta un pisina gigantesko pa por a presentá su show di dòlfein. Esaki ta mas ku 25 aña pasá. Meskos tambe ku konstrukshon di Amphy theater patras di WTC, kaminda awe tin Clarion Hotel, tempu ku a presentá Juan Gabriel i Ana Gabriel. Inolvidabel ta tambe e estreno di e parking lot di WTC ariba, kaminda na 2004 a monta e espektákulo di Juan Luis Guerra i algun aña despues ku a habri tapeit riba e tereno di Stadion Johnny Vrutaal, pa a monta e konsierto atrobe di Juan Luis Guerra i su 440. E biaha akí, Sambil su lugá di stashoná outo lo ta grandi i grandioso ku e promé evento Internashonal VIVA LA MÚSICA LATINA CURAÇAO 2015. Keda pendiente pa mas informashon al respekto!