Na Universidad di Aruba

ORANJESTAD, Aruba – 10 di November 2015: Na aña 2014 a introduci e programa “Educational Leadership for Collaboration” na Universidad di Aruba como programa di profesionalisacion pa tur lider den enseñansa of tur esunnan cu ta aspira pa bira lider. E programa a wordo haci posibel cu sosten di fondonan di Union Europeo cu a wordo aloca door di Ministerio di Enseñansa di Aruba specificamente pa por desaroya y ofrece e programa aki tur aña na un grupo di profesional den e sector di enseñansa. Mientras tanto dos grupo a participa na e programa aki cu resultadonan hopi positivo y awo ta cla pa start cu e periodo di aplicacion pa e di tres rond di e programa. E programa “Educational Leadership for Collaboration” ta consisti un curiculo hopi varia y actividadnan hopi extenso e.o. seminario, intercambio di experencia y conocemento den grupo, tareanan y interaccion via un online platform. E temanan di e seminarionan ta entre otro “Leadership for Collaboration: Navigating towards the Vision of Education”, “The psychology  of leadership in a complex and dynamic educational environment”; “Embodying the new story of leadership for collaboration in theory and practice” y “Sustaining a community of practice to create solutions collaboratively”. E programa ta dura den total 9 luna y na final e participante ta ricibi un “post-graduate profesional development certificate” for di Universidad di Aruba.

Lo tin diferente facilitado internacional envolvi den e programa aki di cual cada un lo ofrece diferente di e seminarionan. Entre e facilitadonan lo tin Janet Sanders di Jean Houston Foundation, Dough Banner director di Flow Project y profesor na Western Washington University y Scott Miller, autor di diferente publicacion y actualmente CEO di un organisacion cu ta maneha diferente scolnan na California. E periodo di aplicacion ya ta habri y tur profesional den e ramo di enseñansa cu ta interesa pa sigui e programa aki por aplica via di Center for Life Long Learning di Universidad di Aruba. Pa mas informacion por tuma contacto via telefon 526-2259 of via email cll@ua.aw. E deadline pa aplicacion ta dia 13 di november 2015. Participacion na e programa ta gratis pero tin un capacidad maximo di 27 persona. Dependiendo di e cantidad di aplicacion lo tene un seleccion pa determina e participantenan. Minister Hooyboer-Winklaar ta enfatisa cu “creando mas oportunidad pa profesionalisacion pa medio di programanan manera Educational Leadership for Collaboration, nos ta un paso mas cerca di nos metanan di innovacion, desaroyo y progreso sostenibel den nos enseñansa”.  E titular di enseñansa ta haci un yamada na tur profesional interesa pa participa na e programa aki pa haci bon uzo di e oportunidad y ta desea e participantenan y e organisacion hopi exito cu e di tres rond di e programa.