Willemstad – Djaweps on 21 di yüni 15 kliente di FKP ta risibí yabi di nan apartamentu na Sapaté. Ta kulminashon di un trayekto di formashon  basá riba e prinsipionan di hermandat, kompañerismo, i dikon ta importante pa biba bon ku bisiña.

Finalmente e abitantenan por habri porta di nan kas i biba felis ku nan sernan kerí. Nan lo ta e proménan  ku lo bai habitá un di e 72 apartamentunan aki di 2 a 3 kamber. Pa por a bin na remarke pa un di e kasnan aki, e habitante entre otro mester a pasa un trayekto di preparashon pa siña kon kombibí ku otro di forma harmonioso, responsabel, i komo bon ko-siudadano.

Fundashon Kas Popular huntu ku Ministerionan di SOAW i VVRP a kumpli ku siudadanonan ku tabatin  nesesidat i anhelo pa un vivienda den tur trankilidat p’asina por sigui na biba huntu ku nan sernan kerí.

E trayekto aki ta forma parti di e maneho di vivienda di gobièrnu  ku ta dirigí  pa atendé ku urgensia ku e lista di espera di kas.

“Nos a traha den estrecho kolaborashon ku SOAW i VVRP pa realisá e preparashon nesesario p’e klientenan nan aki por ta felis ku nan kas. I nos ta kontentu ku esnan ku ta risibí nan yabi awe ta un bunita refleho di diferente gremio den nos komunidat. Nos ta sumamente satisfecho di konstatá kon trahando huntu ta yega na bon resultado pa krea mas i mihó kombibensia ku otro den bario”, Arthur Con a bisa, Direktor di FKP.

Segun Minister Koeiman den kuadro di su maneho di bienestar sosial, e ta aploudí e tipo di trayektonan aki ku no solamente ta sòru pa hendenan haña un dak riba nan kabes, pero  ta empoderá nan tambe pa nan por konviví ku nan ko-suidadanonan”.

“Gobièrnu huntu ku FKP ta sigui hasi esfuerso pa asina kumpli ku e nesesidat di bibienda di nos Pais”, Minister di VVRP Zita Jesus-Leito ta agregá.

E atardi ta kulminá ku un tradishonal entrega di yabi na e klientenan  un momentu di reflekshon i bríndis pa inougurá e edifisio. Awor ku entrega di e promé apartamentunan ta tras di lomba, ya Lèsnan di preparashon a kuminsá pa e siguiente grupo di habitante. FKP ta kontinuá miéntras tantu ku finalisashon di infrastruktura, landscaping, parke pa rekreá  i lugá di parker. Keda pendiente pa mas informashon di e trayektoria aki di FKP huntu ku ministerionan SOAW i VVRP, den kreashon di bario bibabel i sigur na Kòrsou.