Lidernan scout di Corsou, Boneiro y Sint Maarten a reuni na Aruba

ORANJESTAD, Aruba – 16 di november 2015: Aruba e aña aki tabata anfitrion di e encuentro “Koempoelan 2015” cu ta un reunion entre lidernan scout di Aruba, Corsou, Boneiro y Sint Maarten. Pa mas di 30 aña ta tene e encuentronan anual aki y tur aña ta organis’e na un otro isla den Caribe Hulandes. E aña aki tabatin un total di 163 lider cu a participa na e reunion aki. “Aruba a participa cu no menos di 65 lider”, asina John Hessen, Hoofd Commissaris di Scouting Aruba a duna di conoce. “Locual mas a hala atencion e biaha aki tabata e participacion masal di lidernan hoben, demostrando cu hopi scout, despues di alcansa cierto edad, ta opta pa sigui den e organisacion, ta educa nan mes y ta asumi puestonan den liderazgo, pa por sigui guia muchanan y hobennan riba e caminda corecto. Durante e reunionnan di Koempoelan 2015, a delibera hopi riba e trabou cu ta eherciendo como lidernan scout, kico e ta nifica pa nos comunidad y con por keda motiva pa sigui haci esaki. Otro aña e encuentro “Koempoelan 2016” ta tuma luga na Sint Maarten y di awor caba Aruba ta cuminsa prepara pa por biaha cu un cantidad di lider pa atende e encuentro importante ey. Ta bon pa enfatisa cu Aruba e aña aki a dedica e encuentro “Koempoelan 2015” na Fernando Kock, siendo un di e lidernan honorario di e organisacion y un di esunnan cu mas aña di edad tambe y cu a participa pa hopi aña den casi tur e encuentronan Koempoelan.

Graveey Anthony, District Commissaris di Scouting Bonaire a duna di conoce cu nan ta participa cu un grupo chikito di 4 persona. Asina mes nan ta masha contento di nan participacion, pasobra e organisacion tabata tremendo, e delegacion a pasa bon y a siña hopi y a intercambia hopi cu e otro islanan ruman den Caribe Hulandes. Frendsel La Cruz ta Hoofd Commissaris di Scouting Antiano, a conta cu un biaha pa aña e lidernan di e islanan ruman den Caribe Hulandes ta bini hunto pa reuni. Locual a sorprende e lider di delegacion di Antias ta e cantidad di hobennan cu a participa. E ta contento di anuncia cu for di Corsou a biaha cu un cantidad grandi di lidernan scout, un total di 90 lider, tras cu Boneiro a trece 4 y Sint Maarten tambe 4 lider. “Nunca bo no ta grandi pa siña, bo ta siña di esunnan mas chikito. Y remarcabel ta cu e aña aki a bin hopi hoben pa participa, indicando cu e organisacion scout tin futuro”. E organisacion di scout na Corsou a cumpli no menos di 85 aña di existencia y ta cla pa bay un otro 85 aña mas. Na Aruba e historia di scout tambe bay te cu 85 aña atras, pero e organisacion Scouting Aruba, despues di a uni 4 organisacion hunto, ta existi pa 15 aña awor y ta e organisacion nacional representando e 13 gruponan scout riba nos isla, afilia na Inter American Scout Organisation (ISO) cu ta miembro tambe di World Scout Organization esta WOSM. Scouting ta contribui na desaroya hobennan ehemplar pa bira lidernan den nos comunidad. Awendia Scouting ta e organisacion mas grandi na Aruba, cu mas di 500 miembro activo. E movecion scout ta existi desde aña 1907 ora cu Lord Baden Powell a cuminsa cune 108 aña pasa y cu lo keda existi pa semper pasobra “Once a Scout, Always a Scout”.