Cultura a resona den Paradera, cu un rotonde dedica na DANDE

Diabierna anochi e bario di Paradera a briya cu nan rotonde. Un Rotonde dedica na e musica di Dande. Cada instrumento un obra riba su mes cu a keda den man di e artista Robert “Robby” Solognier. E rotonde a keda completa cu kerstboom cu mensahe y deseonan special pa e temporada y e aña nos dilanti cu a keda den man di 7 scol di Paradera y vecindario: Maria Goretti, Big Bird Speelschool, Pastoor Kranwinkel, Scol Duna man, Scol Preparatorio nos Paraiso, Emma School y Sint Jan Kleuterschool. Ministerio di Turismo y Cultura, Comision Decoracion di Rotonde di Paradera conhuntamente cu e 7 scolnan ta esnan cu pa e ultimo 4 añanan a sa di surpasa tur expectativa cada aña.

Un bunita tradicion di ultimo añanan ta e Pesebre BIBO cu un biaha mas t’ey presente na Rotonde di Paradera. Muchanan di Scol Nos Paraiso conhuntamente cu e sosten di Santa Rosa ta crea e ilusion di e bunita momento cu Niño Hesus a nace, e motibo real di e celebracion di Pasco.

Minister Otmar Oduber conhuntamente cu Vicente Tromp tabata esnan cu a keda encarga pa oficialmente cende e luznan riba e rotonde. Durante e discursonan a menciona e importancia di Cultura y Tradicion cu ta bisto den e obra bunita aki.

Tur scol participante tabata tin tentnan cu nan obranan pa recauda fondo. Pa entretene esnan presente tabata t’ey Los Paranderos, Arugaldo, Paranda ta nos y pa cera e anochi, muchanan di Mama Rosa.

Cultura a resona den e bario di Paradera pero pa henter Aruba! Un danki na Aruba pa a forma parti di un anochi asina exitoso y cu e simbolo di cende e luznan na Rotonde di Paradera por contagia cada un di nos pa drenta den bunita ambiente y temporada di Pasco. Un temporada di paz, amor y union familiar.