Willemstad – Ta eksaktamente 1 siman despues ku e leon King, e rei di Parke Tropikal a fayese, i awe Fundashon Parke Tropikal a basha e kouchi abou mandando asina un señal kla ku e fundashon tampoko ta aprobá bestianan sera den kouchi. E kouchi di King ta data di 1952 i tabata un donashon di Lions Club. E tempu ei tabatin otro reglanan pa konstrukshon di kouchi pa bestianan eksótiko. Hoy en dia zologikonan ta fungi komo un ‘opvang’ kaminda ku animalnan ta haña mihó kuido ku e meta pa konservá, reprodusí i reintegrá bek den naturalesa. Na aña 1942 a kumisa ku un ‘Plantentuin’ ku despues ku outoridatnan tabata konfiska bestianan ku tabata drenta nos isla di forma ilegal, a konvertí den un dierentuin. Bestianan for di kolekshonnan privá, ku doñonan no por a kuida mas, tambe tabata manda pa dierentuin. Na aña 1952 a konstruí e prome kouchi di leon. Asina mas i mas bestia a keda agregá na e kolekshon. Mundialmente kresementu drástiko di poblashon di hende i jagmentu sin kontrol a pone ku meta di zologikonan a kambia di simplemente entretenimentu pa konservashon i edukashon. Korsou lamentablemente no a sigui e desaroyo aki i a keda hopi atras. Pakolmo na aña 2010 orkan Tomas a kousa hopi daño material i na bida di e bestianan.. Na aña 2011 e direktiva nobo a sinta i nan a haña e parke i bestianan den un situashon hopi prekario, ku di un manera of otro mester a deal kune. Nos tur ta di akuerdo ku Korsou mester di un parke di bestia, un area botaniko i di rekreo aksesibel pa famia, ku alabes ta un area turistiko. Un parke ku ta funshona segun reglanan internashonal ku tin konservashon, reprodukshon i edukashon komo meta. Simplemente saka e bestianan for di kouchi no ta un opshon pues diretiva di Fundashon Parke Tropikal ta fokus huntu ku manager di parke Hubert Isenia, trahadonan i boluntarionan riba drecha e kalidat di bida di e bestianan, drecha infrastuktura i traha riba projektonan edukashonal. Pa loke ta trata e bestianan, a drecha nan dieta, duna nan material di enrikesimentu pa stimula nan instinto natural i huntu ku un trainer profeshonal hasi nan mas sosial i amikal. E parti di infrastruktura, Fundashon Parke Tropikal ta trahando ku ofisina di arkitekto riba e plan maestro ku den 10 aña lo mester upgrade henter a area kompletamente segun reglanan internashonal. Ta desaroyando diferente projekto edukashonal pa mucha manera Zoo Rangers Club ku lo siña muchanan e balor di planta i kuida nos naturalesa i bestianan. Internashonalmente Parke Tropikal ta serando aliansanan ku otro zologikonan i santuarionan manera Miami Zoo, Columbus Zoo & Aquarium, Stichting AAP, Avifauna, Apenheul i mas. Ta pa entre otro upgrading di e kouchinan i infrastruktura di e parke den su totalidat, Fundashon Parke Tropikal ta pidi yudansa finansiero na gobiernu i komunidat di Korsou. Ku simplemente un kontribushon di 5 florin mensualmente kada yu di Korsou por yuda pa logra e meta di tin un parke ku ta akreditá segun reglanan internashonal i ku grandi i chiki por siña i diberti.