ORANJESTAD, Aruba – 22 di april 2018: E hunta di Directornan di Aruba Hotel and Tourism Association (AHATA) ta anuncia nombracion di Tisa LaSorte como CEO y Presidente di AHATA, entrante dia 18 di juni 2018. Actualmente Tisa LaSorte ta emplea na Bucuti & Tara Beach Resort como un miembro di nan ekipo di gerencia.

Mester bisa cu e tin un amplio conocemento den e industria di hospitalidad, gerencia, periodismo y mercadeo. Den su rol nobo, Tisa LaSorte lo enfoca riba atrae mas turismo sostenibel pa garantisa exito continuo pa nos isla, promoviendo un maneho sensato dedica na turismo, sigurando e miho interes di tur e miembronan di AHATA y sostene envolvimento di henter comunidad.

“Nos ta masha gradici na Jim, cu a sirbi AHATA y e comunidad grandi di turismo di Aruba pa e ultimo 8 añanan. Nos por mira bek riba algun logro importante bou su liderazgo den area di mercadeo di e isla y den lobby na interes di nos miembronan. Nos ta dese’e tur cos bon den su esfuerso nobo”, asina Tom Calame, Presidente di AHATA, a duna di conoce. “Nos ta desea Tisa un caluroso bon bini den e team di AHATA como e CEO y Presidente nobo. Nos ta spera di por sigui traha riba un futuro briyante cune”.

Tisa LaSorte ta naci y lanta na Aruba. E ta yiu di ex-Diputado di Turismo y ex-Gezaghebber Oscar Henriquez. Despues di a logra su diploma den “Broadcast Communication Management”, el a inicia su carera como un reportero respeta na Tele Aruba, prome cu el a muda pa bay biba na Merca. Durante e 20 añanan cu el a biba na Merca, e tabatin un carera exitoso den maneho di stacionnan di television grandi den noticia y deporte na Chicago y na Phoenix.

Aruba Hotel and Tourism Association (AHATA) ta representa e sector turistico di nos pais desde su fundacion na aña 1965. Actualmente AHATA ta conta cu mas di 100 miembro y ta responsabel tambe pa e “Aruba Casinos Association” y e “Aruba Hospitality and Security Foundation”. Su rol primordial ta di ta e bos pa crecemento sostenibel pa tur su miembronan. Pa mas informacion por subi www.ahata.com.