Despues di 12 aña

ORANJESTAD, Aruba – 25 di november 2015: Durante di un evento special Aruba Tourism Authority a anuncia e eliminacion di visa pa bishitantenan di Colombia pa Aruba. Anfitrionnan di e evento aki tabata CEO di A.T.A., Ronella Tjin Asjoe-Croes, Directora di A.T.A. Latino America, Miriam Dabian y representante di Aruba na Colombia, Maria Victoria Galan. Hunto cu socionan clave, relacionnan di hopi aña cu semper a keda cu un entusiasmo grandi pa bende Aruba, a refleha riba e gran noticia aki pa mundo turistico di Colombia diamars mainta. E visa tabata vigente pa 12 aña y lo wordo elimina entrante dia 3 di december proximo.

Colombia ta un mercado desea pa Aruba. Durante di ultimo decada e mercado aki, cu su politica y economia stabiel a bira un actor relevante den e ‘mix’ Latino Americano pa e region y mas cu claro pa Aruba. E cambionan positivo cu a tuma luga na Colombia ta refleha den inversionnan internacional na e pais y den mas entrada pa e comunidad, cu ta permiti e turista Colombiano tambe pa tin mas placa disponibel pa biahe.

Durante di e evento special Ronella Tjin Asjoe-Croes a remarca “Colombia ta un mercado importante pa nos unda cu for di 32 aña pasa caba nos a establece un oficina di representacion na e pais keri aki, y a sa di construi bon relacionnan cu boso tur pa promove nos isla feliz.”

Den transcurso di añanan A.T.A. y su socionan den turismo na Aruba a establece amistadnan y relacionnan di trabao estrecho cu mayoristanan, representantenan di aerolineanan y medionan di comunicacion na Colombia, kende semper a apoya Aruba den su promocion como isla turistico.

E CEO di Aruba Tourism Authority a gradici tur esunnan cu a contribui cu nan entusiasmo y esfuersonan na e crecemento di turismo for di Colombia pa Aruba. El a comparti cu durante di 2014, Aruba a yama bonbini na 23.836 turista for di Colombia; esaki ta 22% di crecemento compara cu 2013 y a contribui na e record den cantidad di bishitante di estadia cu Aruba a conoce na 2014, esta 1.072.082.

“Nos ta sigur cu e esfuersonan di boso tur conhuntamente cu e noticia di e eliminacion di e visa entrante dia 3 di december, cual ta complementa crecemento actual di mercadonan clave pa Aruba manera Merca, lo resulta den un aña 2015 grandi unda cu nos lo un biaha mas surpasa e di 1 miyon bishitante,” Ronella Tjin Asjoe-Croes a agrega. For di Colombia, Aruba ta spera di ricibi aproximadamente 20 mil bishitante durante di e periodo januari pa december 2015 y ta proyecta 32 mil bishitante pa 2016.

E visa no a bin sin su retonan ora a introduci’e 12 aña pasa, pero bao guia di entre otro sra. Galan, sra. Dabian y tur socio a logra traduci e retonan den oportunidadnan y a sigui semper cu promocion den e mercado cu a keda stabiel y cu a te hasta surpasa e total di bishitante di e mercado cu Aruba a conoce ‘prome’ cu a introduci e visa.

Cu e anuncio di eliminacion di e visa, Aruba Tourism Authority ta sigur cu e presencia di Aruba den e mercado di Colombia cu semper a keda fuerte, lo duna mas fruto ainda. Bogota ta na apenas un ora y mey for di Aruba cu avion y Aruba ta contento di por sigui yama un caluroso bonbini na turistanan for di Colombia.

“Nos sa, cu eliminando e rekisito aki, nos lo experencia un boom di turismo for di Colombia y e ta un gusto comparti esaki un biaha mas cu boso,” Ronella Tjin Asjoe-Croes a conclui bisando durante e evento cu a wordo concuri pa 150 socio y medionan di prensa y unda a reina un entusiasmo grandi.