Willemstad– Djasabra awor 6 di yüli lo tuma lugá un show di moda estilo pasarela kombiná ku un eksposishon di kostura.  E aktividat a keda organisá dor di un grupo di kursista ku ta siñando e habilidatnan básiko di kostura. Judes VIP Sewingclub ta brinda oportunidat na hoben i adulto pa sera konosí ku e arte di kostura. Durante un temporada di 10 siman kursistanan ta sigui lès serka diseñado di moda Judeska Carlo i nan ta sinja diferente téknika dependiendo di nan nivel. Pa klousura e temporada aki e kursistanan di nivel básiko A i B, i tambe esnan avansá nivel C lo presentá nan kreashonnan durante di un anochi ku nan a titulá: The Rising Fashion Stars Runway Show. Esnan ku akudí na e evento lo keda di trit ku diferente kolekshon pa dama i kabayero pa asin’aki demostrá kon ku un tiki kreatividat un hende mes por krea trahenan bunita pa diferente okashon. 9 kursista lo eksponé i 14 kursista lo presentá ku un kolekshon ku lo keda presentá riba pasarela dor di diferente modelo. E aktividat aki lo tuma lugá djasabra 6 di yüli 2013 di mitar di 8 pa mitar di 10 di anochi na Kas Parokial Suffisant (den kura di Misa di Suffisant) i ta kosta 25 florin pa entrada. Pa mas informashon por bishita e página di Facebook di Jud Carlo of Francabenedicta. Interesadonan ku ke presensiá e evento aki por tuma kontakto na number di telefon: 529-1111. Amante di kostura i tambe di moda, konsidera esaki komo un invitashon personal.