… Durante di ‘Best Tourism & Hospitality Graduate Ceremony 2013’…

WILLEMSTAD- 3 di yüli 2013 –Ya ta pa di sinku aña konsekutivo ku Ofisina di Turismo di Kòrsou (CTB) ta organisá un seremonia spesial durante kua ta duna rekonosementu na un grupo di studiante ku a gradua den e profeshon di Turismo i Hospitalidat ku resultadonan ekstraordinario, e aña aki sigur no ta un eksepshon. Un total di 12 studiante a forma parti di e ‘Best Tourism & Hospitality Graduate Ceremony 2013’.

Den un esfera di selebrashon a inisiá e seremonia ku palabranan di Minister di Desaroyo Ekonómiko Sr. Stanley Palm. Despues di esaki a kontinuá ku e seremonia di entrega di sertifikado kaminda e mihó graduadonan den e profeshon di Turismo i Hospitalidat a risibí un sertifikado di Best Tourism & Hospitality Graduate i pa promé biaha un award di ‘Dushi Hende’. E award aki lo mester sirbi komo un rekuerdo pa e studiantenan ku a sá di reflehá e 6 balornan básiko di e kampaña  di ‘Dushi Hende’; Hospitalidat i Servisio, Responsabilidat i Orguyo, Integridat i Honestidat den nan komportashon. Risibiendo un sertifikado manera esaki sigur lo sirbi komo un motivashon èkstra pa e studiantenan, pa sea kontinuá ku estudionan riba e tereno aki òf pa laborá den e merkado di turismo. Na final di e seremonia di sertifikado, Sr. Miles Mercera kende ta èks -mihó graduado i Marketing & Product Manager di CHATA a dirigí algun palabra di inspirashon na e studiantenan. Hóbennan ku a risibí sertifikado durante e ‘Best Tourism & Hospitality Graduate Ceremony 2013’ ta hóbennan ku a bishitá diferente skol lokal i sigui nan estudio di Turismo i Hospitalidat. Tabata: Jill Slijkhuis (CDC),  Rochlayna M.R. Jansen i Fernando B. Zimmerman (Nilda Pinto SBO), Shendrick Randt (Jacques Ferrandi VSBO), Ashanty Herman (Marnix VSBO), Tagianna Gruber (OTC), Jurniela Laken i Judnairie Martis (FEFFIK), Sabrina Lourens i Claudemy Fransina (Maris Stella SBO), Sharrelson Paulina (Maris Stella VSBO) i Thaisany Clarinda (ICUC) ku a risibí e rekonosementu spesial aki di CTB. Ofisina di Turismo di Kòrsou ta felisitá tur e hóbennan ku a demostrá disiplina, dedikashon i trabou duru pa asina terminá nan estudio ku éksito.

Pa tur esnan ku ta aktivo riba Facebook kòrda ‘like’ e página di Facebook di ‘Dushi Hende’ – www.facebook.com/DushiHende.