WILLEMSTAD:- Tabata ayera nochi ku Euphoria Management Team a presentá e proyekto “Konsierto Prince Royce / Soy El Mismo” na Kòrsou. Durante di un konferensha di prensa ku a tuma lugá na Marriott Beach Resort Curacao, a revelá tur detaye di e konsierto ku lo tuma lugá próksimamente na Kleine Werf. Dia 14 di yüni ta asina leu ku e kantante ídolo di bachata, Prince Royce lo bishitá Kòrsou pa di dos bes. Den e último 2 añanan Prince Royce a sá di konkistá kurason di grandi i chikitu, ademas di esaki aglomerá un gran kantidat di premio internashonal, su mas resiente premionan den Grammy Latino ta prueba di su gran popularidat. Athuntu ku esakinan e’la gana 15 premio Billboard Latino, 3 Ascap Awards, 9 BMI Awards, 17 premio Juventud i 2 Soberano Awards.  Awor, kontando debidamente den e liga grandi di bachata- e kantante ta regresá Kòrsou ku su gira “Soy El Mismo”.  Ya kaba Kòrsou a keda agregá na e iterinario di e gira. Pa mas informashon por bishitá, http://www.princeroyce.com/tour/

Pa e konsierto lo tin 3 sekshon;  General, VIP Gold i VIP Platinum:

Sekshon General ta kosta 75 florin, na porta esaki lo bira 100 florin. Sekshon VIP Gold, ta kosta 250 florin, na porta 275 florin- esaki ta inkluí 2 bebida, akseso na e VIP Gold Lounge i ubikashon pará dilanti di esenario. Sekshon VIP Platinum ta kosta 350 florin i ta inkluí, ‘all inclusive drinks and snacks’, asiento na mesa riba e platinum deck, servisio di waitress na mesa i ubikashon pará dilanti di esenario. Karchinan lo ta na benta na: Prince Royce Outlet na Camaleon Mall, Mensing’s Caminada, Tik Tak, Beep Beep Rio, Albert Heijn Supermarket, van der Tweel Supermarket na Jan Thiel i Pagadero na Saliña.

Detayenan di Konsierto:

Portanan pa e konsierto ta habri 6’or di atardi, miéntras ku pre-show ta skematisá pa 9’or di anochi. Entre 6’or ku 9’or lo tin animashon di DJ i pa 9’or lo tin presentashon di Ephrem J i Randy Leroy kompañá pa Dreams, pa finalmente e artista Prince Royce klousurá e anochi ku respaldo musikal di su propio orkesta.

Gimmick:

Pa ranka sali ku e ambiente antisipando e konsierto, lo tin 1 dia di pre-benta na preis spesial. Únikamente riba djasabra dia 10 di Mei próksimo lo ofresé karchinan general na 50 florin i karchinan VIP Gold na 200 florin. Esaki lo tuma lugá na e Prince Royce Outlet na Cameleon Mall nèt banda di Tony Romas entre 12’or di mèrdia i 5’or di atardi. Despues ku e keda anunsiá ku Prince Royce lo regresá Kòrsou pa un solo presentashon ya por a nota un entusiasmo rondó di henter e konsierto. Miéntras ku Euphoria Management a skematisá un konferensha di prensa e siman entrante na Aruba den koperashon ku CTB , ya por a nota un gran entusiasmo na e isla.  E kantante di diferente hit manera, “Amor Incondicional”, “Stand by Me”, “El Amor que Perdimos” i su mas resiente éksito “Darte un Beso” a sa di konsagrá su mes den un berdadero ídolo di e género musikal bachata. Ta premirá un tremendo konsierto ya ku públiko for di islanan ruman tambe a kuminsá demostrá un interes grandi den e presentashon di Prince Royce próksimamente. Pues Kòrsou, Aruba, Boneiru, St. Maarten i otro islanan lo disfrutá di un gran konsierto. Dia 14 di Yüni próksimo, Prince Royce ta bin!