WILLEMSTAD —  Bou di e slogan “Yena bo bida i di otronan ku koló”, EY Dutch Caribbean ku ta selebrando 65 aña, i JCI Dutch Caribbean lo organisá riba dia 1 di yüni e promé edishon di Curaçao Color Walk. E ‘fun walk’ aki lo kuminsá i kaba na Brionplein i lo kubri 5 kilometer dor di kayanan di Otrobanda. E aspekto úniko di e festin di koló spòrtif aki ta ku partisipantenan lo ser kubrí ku puiru di diferente koló na diferente punto durante e ruta. En espeshal na final e evenemento lo kulminá den un fiesta di kolo. E kaminata di koló aki ta nobo pa Kòrsou pero ya a tuma lugá na diferente país rònt mundu. Na okashon di nan 65 aniversario i revelashon di nan slogan nobo “Building a better working world”, EY a lanta un komishon interno (EY Cares) ku lo sigi duna kontenido na EY su programa di responsabilidat sosial i lo traha pa duna un aporte positivo i duradero na desaroyo di nos komunidat. Den e kuadro ei EY tambe ta traha huntu ku Curaçao Cares.  Basá riba e vishon mutuo i e dedikashon pa ehersé nan responsabilidat sosial ku EY Dutch Caribbean i JCI Dutch Caribbean ta kompartí, a disidí pa uni forsa pa huntu organisá e promé ‘fun walk’ di koló na Kòrsou ku e intenshon pa hasi esaki un evenemento anual. JCI (Junior Chamber International) Dutch Caribbean konosé 200.000 miembro aktivo rònt mundu entre 18 i 40 aña ku ta traha pa krea impakto positivo den nan mes komunidat.

No dañino pa medio ambiente

Lokual ta hasi e kaminata aki diferente for di kaminatanan tradishonal ta ku lo tin 7 diferente stashon riba e ruta kaminda lo spùit e partisipantenan ku un puiru di koló ora nan pasa. Kada stashon di koló a ser realisá ku sosten di algun sponsor prinsipal, esta Maduro & Curiel’s Bank N.V, Subway, Kpaint by Kooyman, Badia Coconut Water di Pietersz Import, Amicorp, U by Kotex di Pietersz Import i naturalmente EY. E splash di koló na final ta kortesia di SIXT rent a car. E impakto di koló lo resaltá riba e t-shirt blankunan ku partisipantenan lo tin bistí. E substansha no ta dañino pa salú ni pa medio ambiente i por laba kita fasil.

Meta

Hinter Kòrsou ta invitá pa bin kana, kore, baila i gosa ku otro den kayanan di Otrobanda pa selebrá un estilo di bida salú i pa alabes duna un otro su bida tambe koló.  Kada persona ku partisipá tambe ta kontribui direktamente pa hasi bida di esnan ku mester di sosten den nos komunidat mas kolorido. E meta di Curaçao Color Walk ta pa rekoudá fondo pa otorgá na JCI Dutch Caribbean, Sokudi i e proyekto YAVE. Sokudi ta un organisashon ku ta representá personanan ku malesa di suku. Nan ta promové un estilo di bida salú dor di promové moveshon i dor di brinda diferente aktividat pa informá i konsientisá komunidat di Kòrsou.  Yudansa Alternativo pa un Vishon Eksitoso (YAVE) ta un proyekto di Federatie Antilliaanse Jeugdzorg (FAJ) ku ta brinda prevenshon alternativo pa evitá ku hobennan entre 10 i 24 aña ta sigui riba un kaminda robes. Nan ta empoderá e hobennan pa skohe un trayekto positivo i pa krea un futuro eksitoso i duradero pa nan mes. E kaminata aki ta pa buta e organisashona aki alabes mas den ‘spotlight.’

Inskripshon

Personanan di tur edat por partisipá; mucha (for di 4 aña), hende yòn i hende grandi, famia i grupo di amigu i kolega tur ta bon biní. Inskripshon lo tuma lugá dia 24 di mei di 10:00- 13:00 na Subway Brionplein, i riba 26, 27 i 28 di mei di 12:00 te 14:00 i di 17:00 te 19:00 na ofisina di EY na Zeelandia Office Park. (entrada i parker via Schottegatweg Oost). Preis ta 10 florin pa mucha te ku 12 aña i 20 florin pa adulto. Tur partisipante lo haña un t-shirt koló blanku p’asina e kolónan resaltá. Na final lo parti awa i fruta, i lo por sigui fiesta ku ambiente musikal na enkargo di DJ Maarten Schakel. Tambe lo tin e oportunidat pa forma parti di e promé “Curaçao Inclusion Symbol” (CIS), un proyekto di United Nations Development Programme Curaçao (UNDP). CIS ta enserá ku personanan por laga marka di nan dede atras riba varios bolita di klei. Esakinan lo forma parti di un obra di arte nashonal ku lo ser trahá bou di guia di artista renombrá Ellen Spijkstra i un tim di artista lokal. E obra di arte aki lo representá un simboló di inklusividat ku ta haña un lugá permanente den Otrobanda. E kaminata aki tambe a konta ku sosten di otro spònsòrnan, entre otro Guardian Group Dutch Caribbean Fatum, De Jongh’s Sporthuis i Media599. Pa mas informashon i detayenan esklusivo bishitá e Facebook di Curaçao Color Walk òf mail curacaocolorwalk@gmail.com