…Dia 2 di yüli próksimo…

WILLEMSTAD – Manera ta e kaso tur aña Renaissance Mall i Rif Fort den Otrobanda ta brinda e famia kompletu un selebrashon di Himno i Bandera di kita sombré; aña aki lo no ta un eksepshon. Dia 2 di Yüli próksimo, Renaissance Mall i Rif Fort ta invitá tur famia di Kòrsou pa bini huntu pa selebrá e dia spesial aki kuminsando for di 11’or di mainta ku aktividat i entretenimentu te ku 5’or di atardi.

E selebrashon di Dia di Bandera lo konta ku partisipashon di Wabi Club Kòrsou ku lo tei for di 11’or di mainta te ku 2’or di mèrdia ku diferente tipo di wabi, ku sigur lo ta e sentro di atmirashon di públiko. Durante e dia kompletu lo tin e tradishonal bazar kombiná ku un feria di Beyesa i Salú. Grupo di Baile Dushi Kòrsou lo duna un presentashon for di 12’or di mèrdia te ku 1’or di atardi. Ademas di esaki lo duna realse na nos ritmonan kultural ku presentashon di Kai Òrgel for di 1’or di atardi te 4’or di atardi i Típiko Pasa Bon for di 3’or di atardi te  5’or di atardi. Komo chèri riba e bolo lo tin presentashon di partisipantenan di Miss Teenager for di 2’or di atardi te 5’or di atardi. Ta bon pa menshoná ku durante e selebrashon kompletu lo tin músika bibu di DJ Ro-1.  Dia 2 di yüli próksimo tantu grandi i chikí lo por disfrutá di un selebrashon di Dia di Bandera tur afó na Renaissance Mall i Rif Fort. Ta bon pa rekordá ku e aktividat aki lo ta kompletamente grátis, pues aún mas motibu pa bin selebrá e dia spesial den seno familiar na Renaissance Mall i Rif Fort kuminsando for di 11’or mainta te 5’or di atardi.