Den kuadro di e proyekto ‘Horeca Training Werkzoekenden’ resientemente un grupo di 60 partisipante a risibí nan sertifikado despues ku nan a kompletá e trayekto di training Komunikashon Efektivo.  Ta trata aki di un training pa frontliners i un Train-the-Trainer training pa Managers i Supervisors. E proyekto di ‘Horeca Training Werkzoekenden’ tin komo meta prinsipal pa prepará desempleadonan pa subi e merkado laboral di turismo. Banda di e meta aki a yega na e desishon pa introdusí tambe diferente training ku mester tin komo meta pa alsa e nivel di esnan ku ya ta laborá den sektor di turismo. E training di Komunikashon Efektivo ta forma parti di esaki. Durante e training pa e grupo di frontliners e partisipantenan a sera konosí ku diferente konsepto manera entre otro: kon komunika ku kliente i ku kolegá nan, kon resolve problema manteniendo kalma,kon pa duna “feedback” i kon trese bo opinion dilanti. Tambe nan a mira videonan di ehempelnan pa por saka e fout. Pa por sòru pa e konosementu pasa pa demas empleadonan a skohe pa organisá un training di Train-the-Trainer espesialmente pa managers i supervisors. E training aki a konsistí di diferente sekshon di coaching kaminda e partisipantenan por a siña na promé lugá kiko ta nifiká komuniká di un manera efektivo i kon mester pasa e konosementu aki pa demas empleadonan abase di loke nan frontliners  a risibí, trahando den grupo i presenta kon nan lo hasie ku nan empleadonan. E partisipantenan tabata di diferente organisashon ku ta forma parti di sektor di turismo, manera; Academy Hotel, Amazonia, Café Barrista, Dolphin Suites, Livingstone Resorts,Morena Resorts, Saint Tropez,  Sunscape  Curaçao Resort Spa & Casino i Veneto Casino di The Holiday Beach Resort. E training a keda duna pa Deloitte.  Den ehekushon di e proyekto ‘Horeca Training Werkzoekenden’ tin algun entidat enbolbí, Ofisina di Turismo di Kòrsou (CTB) komo esun enkargá ku e proyekto den representashon di Gobièrnu di Kòrsou, Curaçao Hospitality Training Foundation (CHTF) ku ta responsabel pa kordinashon di e trainingnan i Curaçao Hotel  and Tourism Association (CHATA) ku ta fungi komo partner den e proyekto. E proyekto ‘Horeca Training Werkzoekenden’ ta  finansiá ku fondonan di desaroyo hulandes manehá pa USONA.