“Meeting Planners” Brasilero impreshoná ku Kòrsou:

Willemstad- 19 yüni 2013- Riba inisiativa di Ofisina di Turismo di Kòrsou (CTB) i Hotèlnan un grupo di “Meeting Planners” Brasilero ta di bishitá na Kòrsou e siman aki.  Durante di nan bishita nan ta hospedá na Curaçao Hilton Hotel. Algun di esnan ku ta di bishitá na Kòrsou ta ORBEE, Queensberry, Nascimento, IT Travel, Travel Idea, Meridien, GI i NOVA FREEWAY . Durante un programa intensivo prepará dor di DMC Business Serenity,  e organisadónan di Konferensha, Reunion, Biahenan di Insentivo i Evenementu  por a sera  konosí ku e parti turístiko di Kòrsou i tur e posibilidatnan ku e isla ta brinda den e sektor aki. Durante di nan estadia e “Meeting Planners”  a  bishitá entre otro, Marriott Hotel, Renaissance Curaçao Resort,  Santa Barbara Resort Golf & Marina i tambe World Trade Center. Ademas di esaki e grupo por a gosa di un tour na Sea Aquarium i un show di dòlfein na  Dolphin Academy. E  Meeting Planners a haña oportunidat di sera konosí ku otro Destination Management Companies manera ECO, Destination Curaçao i  Tropical Tours, ku tambe ta atendé ku gruponan di bishitante na Kòrsou. Ku Kòrsou tin hopi pa  ofresé nos bishitantenan a keda demostrá durante un rekorido pa Westpunt, tambe pa vários di nos fòrtinan i lanthùisnan. Por hasi menshon ku e grupo ta masha entusiasmá i altamente impreshoná ku Kòrsou, lokual ku por a nota riba e diferente “Social Media” entre otro riba nan facebook i nan blognan personal. Brazil ta un merkado ku hopi potensial pa MICE (Meetings, Incentives, Conferences and Events), i esaki ta un motibu mas pa pone èkstra atenshon pa krea lasonan fuerte i ku den un futuro serkano por ta di gran nifikashon. Kada kompania por kondusí diferente konferensha, evento òf biahe di insentivo pa Kòrsou.