Willemstad – Djamars 2 di Yuli ta dia di Bandera di Kòrsou i e popular lokutor Morgan Isenia a prepará un spesial musikal titulá “Selebrá Kòrsou!”, ku lo dura 2 siman. E spesial aki ta pa kuminsá akitivá for di awor selebrashon di nos Dia di Bandera. Fo’i Djaluna 17 di Yuni te ku Djaluna 1 di Yuli oyentenan por skucha un awaseru dushi di musika i kreashon di eksklusivamente nos artistanan lokal. Tantu den “Morgan Mainta!” riba ACTIVE 104.5 FM (7-10am) i “MAS Morgan!” riba MAS 99.7 FM (1-3pm) lo zona piesanan lokal di nos artistanan ku a kanta Kòrsou i su kosnan den tur forma i ritmo. Kantikanan ku kisas nunka promé bo’n skucha zona na radio. Tantu esnan nobo, komo piesanan bieu ku semper ta trese rekuerdonan dushi. Fo’i seú, tambú, ritmo kombiná, tumba, pop krioyo, rèp na Papiamentu, tumb’í Karnaval te muzik di zumbi i mas. Mei mei den tur e piesanan, Morgan Isenia lo pasa tambe varios poesia di Ellis Juliana.
Skucha, disfrutá i gana!
Pa hasi e eksperiensia mas dushi, lo tin un wega di konosementu na kual tur oyente por partisipá pa gana e premio “Kòrsou GRANDI!” E premio aki ta konsistí di un pakete ku ta inkluí : 1 Bandera grandi di Kòrsou + 1 BOXSET di DOBLE R SSS (400 piesa) + 1 DVD Homenaje Doble R na Ulanda + 2 shirt di YdK-Yu di Kòrsou (costumized) + 1 karchi pa Selebrashon 30 aña HAPPY PEANUTS + 1 entrada VIP pa Konsierto GIO na Parasasa i mas. Tur loke e oyentenan mester hasi ta skucha i rekonosé di piesanan lokal, durante e spesial riba ACTIVE 104.5 FM mainta i MAS 99.7 FM mèrdia.
Tur yu di Kòrsou i esnan ku ta sinti nan mes yu di Kòrsou rònt mundu por partisipá. Manda bo e-mail ku e konstestanan korekto di e piesanan ku bo a rekonosé na morganisenia@gmail.com pa bo partisipá. Tin algun kondishon ku oyentenan mester tene kuenta kun’é, ku lo ser anunsiá durante e programanan. Aparte di e premio “Kòrsou GRANDI!”, tur dia lo tin premionan greit ku oyentenan por gana. Pues for di awor bo ta invitá pa sinti e sabor dushi di nos kultura. Skucha “MM!” riba ACTIVE 104.5 FM (7-10am) i MAS 99.7 FM (1-3pm), disfrutá, partisipá, selebrá i gana! Di e forma aki Morgan Isenia den su shownan radial ta selebrá Kòrsou i kontribuí na amor pa pais!