WILLEMSTAD- 24 di mart 2014:- Resientemente e promé reunion di preparashon pa Operashon Siman Santu a tuma lugá. Operashon Siman Santu ta un esfuerso komun di Ofisina di Turismo di Kòrsou (CTB) huntu ku diferente entidat públiko i priva. Meta di Operashon Siman Santu ta pa garantisá seguridat i trankilidat pa tantu e turista ku ta di bishita na Kòrsou durante e periodo di Siman Santu komo nos hendenan lokal. Siman Santu ta tuma lugá e aña aki di 16 di aprel pa 21 di aprel 2014. Pa di 3 aña konsekutivo CTB a uni forsa ku Kuerpo Polisial di Kòrsou, Ministerio di Salubridat Medio Ambiente i Naturalesa, AVB (ántes LVV), G&GZ (ántes GGD), Fundashon Kuido di Ambulans, Hawk Eye Security, Marechaussee, Warda Kosta, Selikor, Citro i kuerponan di seguridat di áreanan turístiko i playanan públiko, pa ehekutá Operashon Siman Santu 2014. E entidatnan menshoná a ser repartí den dos sekshon; e sekshon ku ta atendé ku órden públiko i e sekshon ku ta atendé ku infrastruktura, limpiesa i komunikashon. Durante di e promé reunion a para ketu na e eksperensia di aña pasa i a palabra algun punto ku mester tene kuenta kuné pa e aña aki e trabounan por kana mihó. Durante e simannan benidero ta e intenshon pa den grupo chikí sigui traha huntu pa asina yega na e plan di ehekushon pa Operashon Siman Santu 2014. Meskos ku tur aña di nobo e entidatnan enbolbí den Operashon Siman Santu ta hasi un apelashon riba nos komunidat pa duna di nan parti pa asina Kòrsou por konosé un Siman Santu trankil tantu pa nos mes komo pa nos bishitantenan for di eksterior.