WILLEMSTAD- 19 di mart 2014:- For di dia 11 te ku dia 18 di mart último Kòrsou tabata anfitrion di e mihó studiantenan hulandes den sektor di turismo riba nivel di MBO.  E proyekto ku a hiba di nòmber ‘Reiswerk Topclass’ a keda organisá dor di Ofisina di Turismo di Kòrsou (CTB) ubiká na Europa (CTBE) den estrecho koperashon ku Reiswerk kual ta un empresa di e asosashon komersial ANVR (Algemene Nederlandse Vereniging van Reisondernemingen). E meta prinsipal di e proyekto aki ta pa introdusí e studiantenan na e industria biahero. E studiantenan a yega Kòrsou ku buelo di Airberlin i a hospedá na Academy Hotel Curaçao. Komo parti di nan tareanan di merkadeo e studiantenan a bishitá; CTB, Ocean Encounters, Dolphin Academy Curaçao, Santa Barbara Beach & Golf Resort Curaçao, Lions Dive & Beach Resort i Christoffelberg. Ademas di esaki e biahe pa Kòrsou a  enserá tambe algun klínika presentá pa e profeshonal den e area di ‘online marketing’ Lars Sang Mo Boom (Boombuzztic) i diferente empresario lokal entre otro: Gaby Lieuw (Sand and Stilettos), Ducks United i Saskia Fung Loij (My Fashion Lifestyle, Spoon & Stiletto’s Entertainment en PR Republic). Na klousura e studiantenan a risibí lektura serka ‘blogger’-nan popular di Kòrsou riba kon pa kombertí un historia  den un  mensahe ku ta krea impakto. Durante e biahe edukativo aki e studiantenan a risibí inspirashonnan ku nan lo por kombertí den ideanan pa nan plan di merkadeo i komunikashon ku nan lo mester presentá na CTBE i algun organisashon biahero dia 24 di aprel próksimo. Via di e proyekto ‘Reiswerk Topclass’ a sá di krea embahadornan pa nos isla ya ku e studiantenan aki lo bai konta despues di nan eksperensianan aki na Kòrsou. Un danki na tur partnernan den turismo ku a hasi e proyekto aki posibel. Por sigui e desaroyo di e studiantenan ku a forma parti di e proyekto via di e ‘blog’ www.reiswerk.nl/blogs òf via #topclscuracao riba Twitter.