Sandra Brown a cera Aruba Women’s Day Conference 2014

ORANJESTAD, Aruba – 11 di maart 2014: E ultimo orador pa presenta durante e di cuater Aruba Women’s Day Conference organisa pa Minister Michelle Hooyboer-Winklaar, su team y sponsornan pa e dia aki, tabata Sandra Brown, kende ta director di Centro pa Desaroyo di Hende Muhe (CEDEHM). Dicho departamento a lanta riba iniciativa di Minister Hooyboer mes, den cuadro di por promove mas oportunidad pa hende muhenan riba nos isla. Sandra Brown a subi escenario cu un cantica di alabansa y pa su sorpresa e cantante mes, esta Derwin Kemp tabata den publico y a subi stage canta e cantica “live”, hunto cu e grabacion. Asina Sandra Brown y e cantante a pone tur hende lanta para, canta y baila, relaha un momento. Loke a sigui despues di e introduccion energetico aki tabata un presentacion cu a capta atencion completo di e mas of menos 550 hende muhenan cu a participa na e conferencia aki. Su presentacion a acapara masha atencion, demostrando cu nos oradornan local tabata di e mesun nivel cu e invitadonan for di exterior. Cada un cu nan experticio, a sa di capta atencion di tur presente den e sala. Sandra Brown cu hopi pasion a conta tocante CEDEHM y tambe a relata un poco di su storia personal y e luznan di su bida, cual ta su tres yiunan – Chandra, Xander y Jair Bogaerts y con nan a yega na ta hobennan stabiel y exitoso. Cu un sonrisa grandi, el a comparti cu esunnan presente e mensahenan cu el a ricibi di su tres yiunan pa Dia Internacional di Hende Muhe, cu un alegria inmenso el a comparti con bendiciona e ta sinti su mes cu nan. Brown a splica cu na prome luga ta bon pa sigui e conseho di un di otro oradornan, cual ta algo cu e tambe ta kere aden: “Kico ta biba den bo bo mester djis sak’e!” Cu esaki e ta anima tur hende muhe pa no tin miedo di bisa kico nan ta pensa y “djis ta bo mes y hende ta acepta bo.” El a splica di su trayectoria pa yega na e posicion di director di CEDEHM, un organisacion di cual e ta hopi orguyoso como e luga unda tur hende muhe di tur edad, religion y descendencia por acudi cu cualkier y tur pregunta. E centro ta ofrece diferente workshop, ta brinda guia y hasta ayudo legal na esunnan cu acudi na CEDEHM. Sandra Brown a conta di e iniciativa “Mi ruman grandi”, cual ta un “Big Sister” program pa mucha muhe y di e expansion di e programa cu ta tumando luga actualmente pa inclui tambe un “Big Brother Program” pa mucha homber. El a introduci su coleganan, nan trabao y cifranan anual di nan trabao y a conta di algun desaroyo cu ta tumando luga. Sandra Brown a duna diferente conseho na e mayornan presente, pero e enfasis mas grandi el a pone riba e dicho “Lead by example!” o sea “Ta e ehempel”. El a subraya e importancia di haci loke bo ta bisa y ta un lider pa bo yiunan no solamente cu palabra, pero cu actuacion, pasobra esey ta locual semper nan lo sigui. No bisa un cos y haci otro, muchanan no ta haci loke bo bisa, pero nan ta haci loke bo haci, tabata e mensahe cu mas a resalta den henter Sandra Brown su presentacion. Su bida no tabata perfecto, cu algun dia hopi dificil y cu esaki Sandra Brown a pone un enfasis grandi riba e importancia di “sigui bo soñonan”. “Bo tin cu sigui bo soñonan. Tur hende tin un soño den nan, pero bo no mester tin miedo pa sak’e,” el a bisa. El a encurasha tur hende pa tribi, durf, pasobra tur hende tin un proposito, un luga y un funcion den bida. “Dios a pone bo aki pa bo haci un cos specifico. Un otro hende no por haci bo cos pa bo,” Sandra Brown a conclui bisando.