Bon tardi mandatarionan Sra. Jeanne Marie  Francisca,.  i Sra.  Irene Dick, respektivamente minister di Asuntunan Sosial i di Bienestar  i minister di  Enseñansa, Deporte i Kultura   i invitadonan. Nos ta huntu awe tardi pa selebrá di manera festivo re-apertura di e sentro di bario akí. Kada bario di sierto tamaño na Kòrsou tin su propio sentro di bario. Asina ta parse di ta riba papel, pero un rekorido kòrtiku pasando algun bario i pueblo ta siña nos ku hopi di nan ta sinti falta di un lugá di enkuentro asina. I e bario òf pueblo ku sí ta disponé di un sentro di bario nos mester konstatá ku e estado ku nan sentro di bario ta aden, ta malu òf masha malu. Esei tabata e kaso tambe aki na Seru, kaminda e “sentro di bario” a para bira un lugá bandoná, ku tabata eksistí bou di sirkunstansia masha deplorabel i peligroso i kasi tabata kla pa por a bash’é abou. FBI a mira e importansia pa trese un kambio den esaki,  meskos ku FBI a hasi ku e kompleho deportivo di Seru. E estado ku e ta aden aktualmente nos por yama úniko pa kasi tur bario di Kòrsou. Pakiko e yudansa akí? Pues un di e metanan importante di FBI ta di duna yudansa i sosten den e sentido mas amplio di palabra na formashon duradero i bienestar di hubentut, pero tambe na esnan di mas débil den nos sosiedat. I kon bo ta realisá e metanan ei? Na nos humilde opinion esei ta dor di hasi formashon posibel riba tereno deportivo,  kultural i sosial. Pasobra si un hende ta sintié mentalmente fuerte, i e por pensa i aktua sano hasta si tur su otro sirkunstansianan di bida no ta loke nan mester ta; e ora ei e ta sembra i kosechá un punto importante pa su propio desaroyo duradero. I e sentro di bario akí, manera e ta restourá i remodelá aworakí ta ofresé na tur e áreanan ei i na su usuarionan tur posibilidat pa alkansá e nivel aki. E muchanan por praktiká awor vòli i basketbòl, hendenan mas grandi por bin topa otro, tin e posibilidat di guia pa huiswerk, e último gritunan di ‘IT’ t’ei presente, a drecha e teater den su gloria grandioso kompletu pa aktividatnan sosial i kultural i e aparatonan di gemnastik ta ampliamente presente. Pero nada no sa bini di mes. Un sentro di bario ta biba pasobra e bario ke pa e biba. Pasobra e bario ta hasi bon uso di dje i pasobra e bario ta sòru i kuidé komo si fuera kada piedra òf mesa ta di e habitantenan mes. Pasobra tambe tur sostén ta bini pa e direktiva ku e bario mes a skohe. Un direktiva ku por garantisá di manera transparente e interesnan di tur habitante di Seru i en espesial di e usuarionan di e kas nobo di bario akí. E direktiva ku mi a siña konosé durante e restourashon konsistiendo di Hayes Nichols,  Chester Poulo, Omar de Champs, Sra Sharene Ignaica i Ludson Weleman. Den man di e direktiva aki e sentro di bario akí ta bou di bon guia. Awor basta papia, pero mi no por klousurá sin yama e siguiente personanan danki pa nan kontribushon fantástiko: Hayes Nicholls ku su team i colleganan. I naturalmente na Mundo, ya pa 35 aña mi sosten i refugio den tur kos ku mi entamá riba tereno di konstrukshon pa e bon kousa. Kuné mi ta eksperensiá kada bes di nobo durante tur e añanei realmente un “Mundial”. Tabata e mesun Mundo, habitantenan, ku a guia boso di tal manera ku bosonan mes por a realisá e restourashon i e konstrukshon di e parti nobo.  Boso aporte i partisipashon tabata un eksigensia di mi parti, pero sin Mundo su vishon i dedikashon  lo no por a pone un idea asina den práktika. Herman Van Veen, mihó konosí komo Shon Manchi, ku aña pasá yüli a organisá den teatro Carré na Amsterdam un asina yamá ‘Benefiet Concert’ di kua e netto benefisionan a keda duna na FBI. E suma aki mi a usa tambe pa hasi un parti di e restourashon grandi aki na e sentro di bario posibel. Un danki tambe ta bai pa Sandra Hay ku a diseñá i traha e plachi di nòmber nobo pa e sentro di bario. Mi team di FBI di custumber:  Sra Violeta Haseth, Clark de Windt, Sigmund Jansen, Percy Pinedo, Julian Esteiner, Jose Luis i su hendenan. Señores Jan Lagendijk, Wim Trapenberg i Sr Walter de Jongh. I finalmente un danki na tur habitante ku a yuda duna un man na e rekonstrukshon.  Ounke a paga boso tur pa e trabounan hasí durante e último 6 lunanan, mi ta spera i loke mi ta eksperensiá diariamente, dor di boso kompañerismo boso a demostrá  netamente: Loke Kahlil Gibran a yega di bisa (den un tradukshon liber): No puntra kiko bo pais i bo bario por hasi pa bo, pero loke abo por realisá di bèrdat pa bo bario. A no ménos ku tin un bon boluntat positivo  presente.

.