Willemstad 10-03-2014- Djasabra último, dia Internashonal di Hende Muhé, mas ku 1800 hende muhé a disfrutá di un anochi speshal organisá pa Iglesia House of Worship entitulá “Si bo kere lo bo mira Su Gloria”. Tur aña di nobo Iglesia House of Worship ta organisá e anochi aki pa bendishoná i enkurashá e hende muhénan pa ta muhénan bendishoná, balente den nan hogar i nos komunidat. E aña aki no tabata un eksepshon. Tur hende presente por a disfrutá di ministrashon di kanto, baile, mímika, un drama konmovedor i tambe un mensahe spesial pa kada hende muhé tresé pa Pastora Arlette Juliet. Tur ku a bini a tende ku si nan pone nan konfiansa den Dios, nan lo eksperensiá Su gloria. Hopi hende muhé a wòrdu toká i bendishoná di un manera spesial i Dios a hasi milagernan grandi di sanashon riba e anochi aki. Siguramente e hende muhénan a sali bendishoná i enkurashá e anochi aki ku tabata kompletamente yen i asta mester a habri dos sala adishonal di “overflow” pa tur esnan ku a asistí masalmente. Riba e kombinashon di potrèt por mira un resúmen di e anochi aki. Ya Iglesia House of Worship ta kompleto den preparashon pa e siguiente moveshon ku Dios ta bai hasi meimei di e pueblo di Kòrsou  dia 20 di aprel próksimo. For di awor Iglesia House of Worship ta ekstendé un invitashon na henter e pueblo di Kòrsou pa presensiá un anochi speshal kaminda lo tin un eksploshon di e gloria di Dios riba nos isla. Keda pendiente pa dia 20 di aprel, 7’or di anochi na Sentro Deportivo Kòrsou. Entrada ta grátis. Dios Ta Hasi Kosnan Ekselente. •