WILLEMSTAD- Ofisina di Turismo Kòrsou (CTB) ubiká na Merka ta orguyoso pa anunsiá ku un bes mas Kòrsou lo ta sentro di atenshon den otro programa di televishon internashonal. E biaha aki lo ta den e programa di televishon ‘The Steve Harvey Show’ ku ta pasa na NBC. Durante di e show lo regalá dos persona ku a ehersé akshonnan ekstraordinario un biahe pa 2 persona, destinashon Kòrsou! ‘The Steve Harvey Show’ presentá pa sr. Steve Harvey konosido komediante, presentadó, aktor i eskritor ta un programa ku tin un promedio di 2.5 mion mirónes pa dia. Ademas di esaki e show tin su propio wèpsait interaktivo; SteveHarveyTV.com ku ta konta ku un promedio di 2.200.000 bishitante pa luna. E programa aki ta elaborá riba tópikonan di aktualidat i na mesun momentu ta brinda tepnan balioso, presentá produktonan nobo i kompartí historianan impaktante. Dia 10 di mart, ‘The Steve Harvey Show’ lo regalá dos persona un biahe pa 2 persona pa Kòrsou. ‘Harvey’s Heroes’ ta un segmento den e programa na unda ta duna rekonosementu na personanan ku a hasi akshonnan ekstraordinario. Den e kaso aki ta trata di dos persona ku a yuda otronan durante tormenta di sneu i e desasternan kousá resientemente na Merka. Komo muestra di apresio ‘The Steve Harvey Show’ lo manda e dos personanan aki Kòrsou pa asina nan por skapa un ratu for di e friu i disfrutá di nos solo. CTB ta kontentu di por a pone 4 ticket na disposishon di e programa ‘The Steve Harvey Show’. Santa Barbara Beach & Golf Resort i Floris Suite Hotel Curaçao a hasi un kontribushon balioso dor di koperá ku estadia pa e 4 personanan aki. CTB ta invitá pueblo di Kòrsou pa sintonisá ‘The Steve Harvey Show’ awe, djaluna 10 di mart, 3’or di atardi na NBC.