Djasabra último, Tropical Events & Beauty Pageantas Foundation, den un bunita show, a presentá nan 16 partisipante ku lo forma parti di e sertámen di “Miss Tropical Teen Curacao 2013”. Riba un bunita stage, e partisipantenan por a modelá y presentá nan mes na e tremendo públiko einan presente. Den trahenan kolorido, e partisipante a risibi nan number y shèrp di nan respektivo bario ku nan ta representá y tambe nan shirt unifòrm ku logo y nòmber di un di nan spònsernan ku ta Insel- Air, for di man de e Presidente Sra. Faride de Meza y Vice Presidente Sra. Rhianna de Meza.E Fundashon ariba menshoná a lanta e aña aki, o sea 2013, pa duna un man pa guia, eduká y forma nos hóbennan. E programa ta konsistí di charlanan y trainingnan edukativo ku ta yuda den desaroyo di nos hóbennan. Tambe lo tin diferente evenemento nan sosial kaminda e partisipante nan lo pasa momentu nan hopi ameno ku otro, disfrutando y konosiendo nos isla stima.Próksimo evenementonan lo ta Miss Playa Tropikal 2013, ku lo bai bira un show tur afó, ku trahenan espektakular ku kada partisipante lo desfilá. Esaki lo tuma lugá den ougùstùs 2013. Seguidamente lo pasa pa e presentashon di Miss Talento Tropikal 2013, ku lo tuma lugá den sèptèmber próksimo.E sertámen final, lo ta den novèmber di 2013, kaminda lo korona Miss Tropical Teen Curacao 2013, huntu ku su finalista nan.E show lo ta un evento, bunita, inovativo y espektakular den tur sentido di palabra. E 16 partisipantenan ta: di R-D: Tiffany Amber Ras,  Angelina Martina, Kim Martina, Paola Boscan, Tonyann Damiana, Johelimar Diaz, Teredwina Hooi, Shania Redjopawiro, Yinyin Lu, Henna Camara Viana, Kisiandra Vrutaal, Yennevier Fernandes de Oliveira, Paola Puche, Maria Chacin y Jennyfer Costa. Un danki special ta bai na tur e spònsernan ku a hasi e evento aki y tur ku ta sigui posibel. Insel- Air, Massive Productions, Creative Curacao, Jayson’s Carousel, Ribs Factory, CFO Financial Solutions e.o.Un makutu yena ku éksito ta bai pa tur e 16 pòpchinan aki.