WILLEMSTAD-  27 di febrüari 2014:- Ya ta konosí ku Kòrsou tin un di e Karnavalnan di mas kreativo i kolorido sigur den region di Karibe. Tur aña di nobo ta dediká hopi tempu na kreashon di trahenan i ta invertí hopi energia den organisashon di nos fiesta nashonal ku ta wòrdu atmirá pa  hopi  hende rònt mundu. Pa Ofisina di Turismo di Kòrsou (CTB) ta un plaser pa un bes mas ta anfitrion di miembronan di prensa internashonal ku lo bishitá nos isla pa brinda kobertura na Karnaval 2014, edishon # 44. Kuminsando 24 di febrüari te ku 5 di mart Kòrsou lo risibí bishita di 24 miembro di prensa internashonal for di entre otro; Alemania, Sürnam, Venezuela, Merka, Barbados i Trinidad. Durante e dianan menshoná e miembronan di prensa lo akudí na tantu eventonan relashoná ku karnaval  komo e marchanan. Entre e miembronan di prensa internashonal invitá tin e konosido Joey Stevens ku ta konosí pa su presentashon meteorológiko na kanalnan di televishon WJET i WSEE ya pa 34 aña. Na 2005 Stevens a laga mundu kompletu sera konosí ku su amigu nobo; e lora Bob. For di e momentu ei nan a bira inseparabel i ta presentá huntu ‘One Caribbean Weather’ ku na 2009 a ekspandé ofresiendo un kobertura meteorológiko pa mas ku 32 isla. Joey i Bob lo ta di bishita na Kòrsou pa transmití nos karnaval pa tur esnan ku ta risibí e señal di One Caribbean Television. For di aworakí a kuminsá ku promoshon pa e transmishon aki, por mira e transmishon via; http://www.onecaribbeanweather.com/  òf FLOW kanal 26. Karnaval di Kòrsou ta konta den e grandinan, pues CTB ta keda hasi su máksimo esfuerso pa promové nos Karnaval den eksterior i asina garantisá ku den e temporada aki por siguí konta ku bishitantenan internashonal. E miembronan di prensa invitá ademas di brinda kobertura na nos Karnaval 2014 ta kontribuí na e meta prinsipal di CTB esta di promové Kòrsou den su merkadonan turístiko. Un danki na tur esnan ku di un manera òf otro ta aportá na e bishita importante aki i laga nos ban demostrá e temporada aki tambe ku nos ta Dushi Hende!