Mira Carnaval for di un brug 20 pia riba L.G. Smith Boulevard

ORANJESTAD –Februari – Renaissance Aruba Resort & Casino  hunto cu GM Affairs ta celebra 60 aña di Aruba su carnaval den style. Pa prome biaha a construi un brug cu lo ‘cubri’ di punta pa punta y ofrece bishitantenan internacional, huespednan y publico local un bista impresionante di Aruba su Carnaval. “Sesenta aña di carnaval mester wordo celebra cu euforia; nos kier a brinda turistanan un manera diferente di experencia nos paradanan. E ‘deck’ aki, lo ofrece un bista estilo helicopter, for di awor aki por conclui cu e lo ta un manera memorabel di por mira e paradanan, cu un bista for di ‘ariba’”, esaki di acuerdo cu Zugheila Lindeborg, ehecutivo di mercadeo pa Renaissance Aruba Resort. E deck di Renaissance Aruba Resort & Casino lo ta situa ‘riba’ tur e accion di e Parada Grandi na Oranjestad. Pa e carnavalista esaki lo nifica cu pa algun minuut nan lo pasa bou di un tunnel- ofreciendo nan sombra pa ‘scapa’ un tiki di e solo cayente. Pa e turista, un bista sin igual! Pa acomoda tur hende Renaissance Aruba Resort & Casino tin un RLIFE LIVE package cu ta inclui ticket di entrada pa e Vip deck pa  diadomingo dia 2 di Maart y ta costa $100 pa persona, esaki ta inclui ‘tokens’ pa bebida, presentacion live di diferente DJ e.o SMB, Mesquitas y Myron Kelly. Esunnan cu cumpra nan entrada pa e VIP deck lo sinta 20 pia riba L.G. Smith Boulevard. Sigur un manera inolvidabel di experiencia Carnaval 60. Pa esunnan cu kier cumpra e carchinan VIP por tuma contacto cu sales@arubarenaissance.com. Entrada ta limita, pues no tarda!