WILLEMSTAD – 19 febrüari 2014 – Den kuadro di selebrashon di dia di San Valentino, Ofisina di Turismo di Kòrsou (CTB) a lansa riba su página di facebook ‘Curaçao’  un kampaña pa selebrá e fecha aki. A pidi amigunan riba facebook pa manda un potrèt ku nan a saka durante nan vakashon na Kòrsou ku ta simbolisá e palabra amor. Den apénas 9 dia 68 persona a manda nan potrètnan aden. A risibí un total di 85 potrèt for di entre otro Hulanda, Alemania, USA, Brazil, Panamá, Canada, Oustria i Chile. E álbum konteniendo tur e potrètnan a keda pone dia di San Valentino riba e página di facebook pa tur hende por a tuma nota di e potrètnan risibí. Un total di 47.822 persona a sea ‘like’, duna un komentario òf kompartí e álbùm ku nan amigunan riba facebook. E álbùm a keda mirá pa 86,764 persona. CTB ta sumamente kontentu ku e reakshon positivo ku e kampaña aki tabatin bou di esnan ku ya a yega di bishitá nos pais i futuro bishitantenan. Pa wak e álbùm kompletu bishitá e página di facebook Curaçao na www.facebook.com/curacaotb.