WILLEMSTAD – 13 di febrüari 2014 – Resientemente Ofisina di Turismo di Kòrsou (CTB) ubiká na Merka a partisipá na un di e ferianan di biahe mas importante den Nort Amérika, ta trata di e popular LA Times Travel Show ku anualmente ta tuma lugá  na Los Angeles, California. A presentá Kòrsou su kultura, historia i kumindanan típiko huntu ku paketenan atraktivo. LA Times Travel Show ta un feria turístiko ku ta konta ku representashon di un gran  parti di mundu entre otro Afrika, Asia, Pasífiko sur, Karibe, Europa, Mexico, Sentro i Sur Amérika i Estádos Unídos. E di 16  edishon di e Travel Show a konta ku presensia di un seri di eksperto di biahe renombrá ku a duna charla i seminario. Aki por hasi menshon di sr. Arthur Frommer, publisista di mas ku 340 guia di biahe Frommer, sr. Henry Rollins, outor di “Smile, You’re Traveling” i e aktris i filántropo Alyssa Milano. Kòrsou a sá di atraé un kantidat grandi di partisipante pa bishitá e sekshon karibense na unda a presentá nos sentro di siudat Willemstad su edifisionan kolorido i históriko ku ta figura riba lista di herensia mundial di UNESCO. Representantenan di Baoase Luxury Resort tambe tabata presente pa promové e resòrt i alabes brinda tur ku a partisipá na e sekshon karibense oportunidat di gana un estadia di 4 anochi. Durante di e LA Times Travel Show a keda komprobá  ku tin un demanda haltu pa opshonnan di biahe nobo. Hopi di e bishitantenan a bisa ku no ta e distansia pa yega e destinashon ta importante pero e loke e destinashon tin pa ofresé i na un preis faborabel. E área metropolitano di Los Angeles ta eksperensiando ekspanshon i kresementu konstante ku ta hiba na un kultura diversifiká. Esaki ta hasi ku Kòrsou ta bira un destinashon atraktivo. CTB  por mira bèk riba un eksitoso presentashon durante di e LA Times Travel Show.