Manera ta konosí, durante Elekshon di Reina, Prens & Pancho Grandi 2014, ku a tuma lugá dia 1 di febrüari último, Komishon di Karnaval Kòrsou a tuma e desishon pa degradá  e duo ku segun hurado tabata Prens i Pancho ganadó (Faisel Zimmerman & Jordan Anthony), na di 4 lugá (3er finalista). Esaki despues di evaluá un komportashon no deseá i kontra reglanan stipulá di e duo; Un komportashon ku a sali na televishon durante nan di dos presentashon di e anochi.

A yega n’e desishon di degradá i no deskualifiká e duo despues di:

–          Konsultá ku presidente di hurado,

–          Konsiderá ku ta un di e integrantenan di e duo a mustra e komportashon indeseabel

–          Konsiderá ku deskualifikando e duo lo bo solamente pone asento riba e aspekto represivo,  eliminando asina oportunidat di guia i forma e persona ku a kometé un eror.

Susesivamente a tuma lugá tur e desaroyonan ku por a tuma nota di dje te ku aworakí den diferente medio di prensa. Komishon di Karnaval Kòrsou a skohe pa no tuma parti na nan i konsentrá na duna guia i sosten lo mas mihó posibel, na tur ku ta habrí p’esaki. Komishon di Karnaval Kòrsou di su parti ke suprayá un biaha mas ku Santley Goedgedrag (Pancho Speransa) & Valdemir Valerius (Prens Amor)  ta Prens & Pancho 2014. Nan ta konta ku sosten di Komishon di Karnaval Kòrsou pero tambe di e diferente finalista i partisipantenan di elekshon Reina, Prens & Pancho 2014. Nan a konfirmá esaki den un reunion ku tabatin djaweps último ku Komishon di Karnaval Kòrsou. Komishon di Karnaval Kòrsou kier pidi pueblo di Kòrsou pa sostené i duna honor na Prens & Pancho 2014, embahadornan di Karnaval 2014 pa loke ta trata Marcha Grandi. Nos ta konta ku tur hende tin Kòrsou na mente, i lo yuda krea un Karnaval ekselente!!!