Kumpra bo pakete awe mes i aportá na Special Olympics Curacao
Willemstad, Curaçao – Digicel i InselAir Community Fund lo forma parti di e ambiente di karnaval na un manera ekstraordinario. Digicel lo djòin InselAir Community Fund na e Red Hot Spot (stelashi) ubiká na Weg naar Welgelegen pa forma un ambiente sin igual ku un meta spesial. E asina yamá ‘Red Hot Spot’ lo ta e sitio pa mira e marchanan e temporada di karnaval aki, ta einan lo tin e ambiente, e goso i un kantidat grandi di premio. Ámbos empresa ta invitá pueblo di Kòrsou pa disfrutá di e marchanan huntu ku nan na Weg naar Welgelegen. Lo tin algun pakete optenibel ku lo inkluí; tshirt, kuminda i bebida, tualèt, seguridat, paramédiko, un stelashi kompletamente kubrí i un kura será, tambe seguro pa tur presente. Lo tin entretenimentu pa mucha ku ta inkluí un kancha di básketbòl i futbòl, pòpkòrn, pintamentu di kara, un show di magia i un kamber ku èrko inkluyendo kuido pa mucha. Pa adultonan tambe lo tin un programa di entretenimentu hinká den otro, ku ta inkluí premionan atraktivo, diferente weganan ku oportunidat di gana premio e.o ‘Wheel of Fortune’ di Digicel. Ambiente ‘wardando marcha’ lo ta den man di un DJ i MC Monty.
Paketenan ‘Red Hot Spot’:
E paketenan di 4 marcha (marcha hubenil, teener parade, marcha grandi i marcha di despedida) lo ta na balor di 195 florin, 3 marcha lo kosta 175 florin miéntras ku 2 marcha lo kosta 145 florin. Pa muchanan entre 2 i 12 aña e paketenan ta; 115 florin pa 4 marcha, 105 florin pa 3 marcha i finalmente 90 florin pa 2 marcha. Muchanan te ku 2 aña ta partisipá grátis. “Nos ta kontentu di por a djòin forsa ku InselAir Community Fund pa por duna un toke spesial na e karnaval di e aña aki i asina hasié realmente ekstraordinario. E kolaborashon entre Digicel i InselAir Community Fund lo pèrkurá pa un rekoudashon di fondo pa atletanan spesial di Special Olympics Curacao. Aña pasá Digicel a rekoudá 15,000 florin den 1 dia pa Special Olympics Curacao bendiendo un armbant ku a wòrdu diseñá spesialmente pa nan. Ta e intenshon pa surpasá esaki e aña aki, bendiendo mas tantu pakete ku ta posibel”, esaki di akuerdo ku Thessa Fleming, relashonista públiko pa Digicel Curaçao. 
Di kada pakete ku wòrdu bendí, 15 florin lo bai pa Special Olympics Curacao. Reservá bo pakete pa famia, amigu òf konosínan awe mes i kontribuí na un manera spesial. Tin 800 kupo ku a keda destiná pa e proyekto aki, pues djòin e ‘Red Hot Spot’ i disfrutá di karnaval. Por kuminsá reservá bo pakete na ofisina di InselAir na Dokweg òf via fly-inselair.com/carnival