WILLEMSTAD- 11 di febrüari 2014 – Resientemente CTB Europa (CTBE) i su partnernan a partisipá na e feria di biahe na Hulanda konosí komo ‘Vakantiebeurs’.  Durante di e feria di biahe, a mustra e mihó kara di Kòrsou na e míles di bishitantenan na e feria. Mas di 117,000 persona a bishitá e ‘Vakantiebeurs’ durante di e 5 dianan ku e feria a tuma lugá. Esaki ta 13% mas ku aña pasa. Sigur un mitar di e kantidat di bishitante a bishita e ‘Caribbean Village’ kaminda ku Kòrsou su stènt a sá di sobresalí ku aktividatnan original i dekorashon outéntiko ku a konsistí di kasitanan típiko di Kòrsou na kolónan tradishonal. E aña aki Kòrsou a forma parti di un inisiativa nobo di e feria kual ta e ‘Culinaire Route’ kaminda tur bishitante por a disfrutá di platonan kulinario di e diferente paisnan partisipante na e feria. Esnan ku a bishitá e stènt di Kòrsou por a ‘pruf’ un tiki di Kòrsou via di e delisioso plato di funchi ku a wòrdu prepará den e ‘Bon Bini Snèk’. Ta bon pa menshoná ku a parti alrededor di 4000 plato durante e dianan di e feria di biahe. Dj Blue Flamingo a sòru pa krea un ambiente típiko di Kòrsou. Riba un di e anochinan, Juni Juliet a pèrkurá pa tur hende ‘swing’ i demostrá ku na Kòrsou nos ta un pueblo ku hopi ambiente. Pa por a midi konosementu di Kòrsou entre e bishitantenan di e feria a organisá un quiz kaminda bishitantenan por a partisipá i gana premionan atraktivo. Alrededor di 3,000 persona a inskribí i partisipá na e quiz. Durante di e feria, CTBE a haña oportunidat tambe di kòmbersá ku profeshonalnan den industria i asina risibí nan impreshon di Kòrsou. A organisá un evento pa sosialisá ku agensianan di biahe, relashonnan den media i periodistanan. Sr. Melvin Statia di e Kabinèt di Minister Plenipotensiario di Kòrsou tambe tabata presente. CTBE a sa di ofresé Europa e mihó kara di Kòrsou. Huntu ku CTBE, tabatin diferente representantenan di nos industria turístiko presente; Ocean Encounters Diving, Hilton Curaçao, Dolphin Academy Curaçao, Amalia Vacation Apartments, Acoya Curaçao, Livingstone Jan Thiel Resort, Avila Hotel, Kontiki Beach Resort, Lions Dive Hotel, Santa Barbara Beach & Golf Resort Curaçao, Dolphin Suites, Renaissance Curaçao Resort & Casino, Howard Johnson Curaçao, Sunscape Curaçao Resort i Veneto Casino Holiday Beach Resort.