Aki dos luna e di tres edishon di Curaçao International Film Festival Rotterdam lo kuminsá atrobe for di 2 te ku 6 di aprel 2014. Ultimo añanan a duna basta publisidat na promoshon i a hasi bon kontakto ku festivalnan di sine di den region. (Cuba, Rep. Dominikana, Haiti i Trinidad) i Amérika Latina (Mexico). Despues di dos edishon sumamente eksitoso Curaçao IFFR a bira adulto i ta riba e bon kaminda pa konta den e sirkuito internashonal di festival di sine. I esaki no ta na último lugá grasias na e Yellow Robin Award ku a keda institushonalisá aña pasá.

Gran oferta pa kompetensia di YELLOW ROBIN AWARD

Ku e kompetensia Yellow Robin Award, Curaçao IFFR ta boga komo deskubridor i promotor di sineasta prinsipiante di region di Karibe i Latino Amérika di duna un aporte na nan karera artístiko. Dor di e kooperashon ku e tan afamá International Film Festival Rotterdam na Hulanda, Curaçao IFFR ta ofresé e sineastanan akí un trampolin pa subi e merkado europeo. Di e manera akí e ganadó di e promé Yellow Robin Award, e sineasta mehikano Natalia Berinstáin, a haña e oportunidat di presentá su sine No quiero dormir sola durante e di 43 edishon di IFFR. Ku e kompetensia akí i e premio relashoná kuné a kai den bon tera den region, ta proba e oferta di no ménos ku 40 sine ku ke bini na remarke pa e edishon di 2014. Un kresementu enorme kompará ku solamente e seis sinenan di e edishon anterior. E sinenan, prosedente di region manera Cuba, Haiti, Aruba, Puerto Rico, Trinidad, Latino-Amérika (di  Venezuela i Colombia te Bolivia i Peru) i hasta for di Afrika (Ethiopia i Tanzania!) ta konfirmá e aseptashon kultural i apresio di e Yellow Robin Award. E nominadonan  pa Yellow Robin Award lo keda husgá durante e festival di sine na aprel dor di un hurado ku ta konsistí di tres persona, dos konosedó di sine lokal i un hurado wespet komo miembro. Pa e posishon akí lo aserká un di e hopi wespetnan internashonal di industria sinematográfiko ku lo bini e festival i lo anunsiá esei despues.

Estreno di e dokumental Cindy Kerseborn

Curaçao IFFR ta honra eskritor/poeta Arion ku e estreno di e dokumental Frank Martinus Arion: Yu di Kòrsou di direktor Cindy Kerseborn. E funshon di estreno lo keda introdusí pa Señora Lucille Berry- Haseth ku presentashon di algún poesía di Arion.

Workshop pa traha sine ofresé pa Konsulado General di Merka

Den siman di 5 t/k 11 di febrüari e sineasta merikano i alabes youth motivational speaker Carmen Marron lo tene algun workshop. Su binida ta un inisiativa di Konsulado General di Merka ofresé na e organisashon di Curaçao IFFR.  Basá riba su propio eksperensianan riba tereno di sine Carmen manera ningun otro lo sa di inspirá en espesial hubentut i motivá nan pa realisá nan idea- i soñonan.

Eksposishon Phi Phenomenon: Vintage Film Cameras and Projecters

E eksposishon ku “photographica” di e kolekshon privá di Michel van Veldhoven naturalmente no tin mag di falta. Esaki ta e aña akí den kuadro di kámara di sine i proyektor kaminda ta mustra e desaroyo di imágennan di sine ku ta move di aña 1903 te na mas o ménos 1970 i esun di kámara for di añanan 1920 te 1980. Tambe lo bai proyektá den e espasio banda di e eksposishon kuater sine di e sineastanan Frank M. Chumaceiro i su esposa Tita. Esakinan a keda produsí bou di e nòmber Curafilms entre 1951 i 1961.

Kooperashonnan lokal

Tambe pa e di tres edishon lo monotoreá e eksperensia di bishitante dor di enkuestradónan di UNA. Ademas Starbucks lo ta presente i nobo e aña akí ta e kooperashon ku Salt + Pepper (den Riffort) ku lo sirbi e aña akí komo ‘film café’. E orkesta hubenil bou di direkshon di Dennis Aalse lo amenisá e festival ku diferente presentashon. Curaçao IFFR tin tambe bista pa talento lokal i desaroyo di talento i tin diferente aktividat:

Short Movies, BIG Stories

E kompetensia lokal di sine kòrtiku Short Movies, BIG Stories e aña akí pa di promé bes ta habrí pa sineastanan lokal di tur edat, kaminda sineastanan profeshonal lokal tambe por partisipá. E tópikonan pa e sinenan kòrtiku (3-5 min) mester kuadra ku un di e temanan fihá pa 2014: Once Upon A Time, Some Like It Hot i Pitch Perfect.

Capture Curaçao

E kompetensia di fotografia digital Capture Curaçao tin e aña akí kuater tema pa foto di koló:: Art of Nature, Celebration, Smile i The Look of Sound, i ún tema blanku /pretu: Floating. Den kada kategoria por gana un premio di Hurado ku tin un suma di plaka mará na dje. Nobo pa e kompetensia akí ta ku di 16 te 31 di mart, públiko tin chèns pa vota pa nan foto favorito. E premio di Hurado i Premio Eskoho di Públiko lo keda anunsiá riba 1° di aprel próksimo. Pa mas detaye mira e sait:  curacaoiffr.com  bou di ‘Competities’.