Oranjestad, 3 februari 2014:  Na momento cu e organisacion di Reina di Scol a acerca e representante di Garnier na Aruba, Medicosmetics Aruba N.V. cu e idea pa organisa un eleccion di Reina di Scol, no tabatin duda cu e evento aki lo resulta den un exito total. Garnier tin como nan slogan ‘Taking Care’ y esaki ta specialmente ta referi na cuida nos medio ambiente. E organisacion di Reina di Scol a pensa den e mesun concepto, pues pa laga tur e eleccion aki, draai rond di cuido di nos medio ambiente y e importancia di reciclahe pa nos medio ambiente. Tanto e speechnan como tambe nan trahe inoficial a causa impacto, mirando cu tur e candidatanan a luci den un trahe Carnavalesco completamente di material recicla. E mensahe di cada candidata tocante cuido di medio ambiente y reciclahe a resalta! Por bisa cu masha orguyo, cu nan mensahenan tabata fuerte y hopi cla, tratando di crea consciencia cerca nos hobennan y henter e publico presente di e gran importancia di reciclahe y cuido di nos medio ambiente. Sra. Jennifer Croes Veers y Sr. Tico Croes a percura pa e bunita decor di e stage na Club Caquetio, cu tabata traha di e materialnan recicla, p’asina demostra e parti creativo y funcional di uza material recicla. Ta despues di 14 aña cu a dicidi di organisa eleccion di Reina di Scol bek, unda cu a conta cu participacion di 6 candidata hubenil y 4 candidata grandi. Na final di anochi, Sammy van Eenennaam, representando su scol Filomena College MAVO a logra e titulo maximo di Reina Hubenil di Scol y Xiena Del Rosario, representando IPA a logra bay cu e titulo di Reina Grandi di Scol. Tanto Reina Grandi como e Reina Hubenil di Scol lo ta e protagonistanan principal riba e carosa di Garnier, specialmente pa nan. Garnier ta felicita henter e comision di Reina di Scol, cu den un tempo cortico a sa di pone un tremendo eleccion den otro. Tambe no por keda sin felicita e dos Reina ganadonan, como tambe tur e otro participantenan cu a tuma e tempo, curashi y iniciativa pa demostra cu creatividad, kico tur por haci cu material recicla. For di awo caba, Garnier ta desea henter pueblo di Aruba, un dushi temporada di Carnaval 60, cu ta un celebracion grandi di nos tur y pa corda mantene nos dushi isla limpi.