WILLEMSTAD- 30 di yanüari 2014 – Kontinuando ku e esfuersonan pa sigui posishoná Kòrsou komo destinashon turístiko den region Karibe, Ofisina di Turismo di Kòrsou (CTB) a organisá un bishitá pa Sürnam ku e ophetivo pa sera kontaktonan importante entre industria turístiko di Sürnam i Kòrsou. Durante di e bishita a organisá primeramente un asina yama  ‘C-Team Salesblitz’, kaminda ku a bishitá agensianan di biahe pa asina gradisí nan pa nan kolaborashon durante di 2013. E tim di CTB a wòrdu kompañá pa representantenan di e siguiente hotèlnan; Livingstone Resort, Sta. Barbara Resort, Renaissance Curaçao, Sunscape Resort, Acoya Resort, Avila Hotel, Holiday Beach Veneto, Quints Travel Lodge, Trupial Inn, Howard Johnson i Plaza Hotel, ku riba nan turno a haña e oportunidat pa presentá nan produkto na e agensianan di biahe. Freezone i InselAir tambe a forma parti di e tim ku a biaha pa Sürnam. Riba e di dos dia, CTB a tene un marshe di informashon den lobby di hotèl Krasnapolsky. Sr. Anoepkumar Baggan, presidente di ASRA, Asosiashon di Agentenan di Biahe na Sürnam a hasi apertura di e Curaçao Infomart. Públiko a risibí informashon di loke Kòrsou tin di ofresé; paketenan di biahe, estadia, sitionan turístiko, informashon di e temporada di karnaval benidero, Seú, i di eventonan musikal ku ya kaba ta skematisá pa e aña aki, manera Marco Borsato i North Sea Jazz. Tambe a posishoná Kòrsou un biaha mas komo e isla ideal pa fakansi den famia, biahe di negoshi i un isla pa esnan enamorá, perfekto pa ‘honeymoon’. Presentashon di Kòrsou na e públiko a keda duná den trahe típiko di Kòrsou, a organisá un rekorido den sentro di siudat na unda ku un tim di promoshon bistí na paña kultural i kompañá dor di un drùmbènt tabata invitá públiko pa yega hotèl Krasnapolsky i partisipá na e marshe di informashon. A ofresé e públiko biahero di Sürnam un eksperensia kompletu; músika di tumba i seú a zona durante di e Infomart p’asina tur hende keda kontagiá ku e ambiente di nos isla, tambe a ofresé pasaboka for di e kushina di Kòrsou. For di Kòrsou chef kok Adryel Lourens a ofresé públiko tutu i funchi hasá nèchi presentá. Chef kok Jethro Wirht, for di Sürnam tambe a duna su aporte preparando un sukulento ‘tuna rol’. Ámbos chef  a gana medaya di plata aña pasá den e kompetensia kulinario di Caribbean Hotel & Tourism Association (CHTA) na Miami. Ta bon pa rekonosé e esfuersonan di e kompania di aviashon InselAir ku a ofresé un deskuento spesial pa transportá e delegashon di Kòrsou pa Sürnam. CTB ta satisfecho ku e bishita i ta kontentu ku e kobertura ‘bibu’ di medionan di komunikashon for di Sürnam na e Infomart ku a pèrkurá pa fluho konstante di bishitante na e marshe.