Den kuadro di e proyekto ‘Horecatraining Werkzoekenden’ finansiá ku fondonan di desaroyo hulandes,resientemente un grupo di empleado den sektor di turismo a risibí nan sertifikado despues ku nan a kompletá e kurso Inglés Nivel Básiko.  Ta trata aki di un total di 16 partisipante ku a terminá e kurso ku éksito. E projekto di ‘Horecatraining Werkzoekenden’ tin komo meta prinsipal pa prepará desempleadonan pa subi e merkado laboral di turismo. Banda di e meta aki a yega na e desishon pa introdusí tambe diferente training ku mester tin komo meta pa alsa e nivel di esnan ku ya ta laborá den sektor di turismo. E partisipantenan e bia aki tabata, Guía Turistiko, Taxista y Servisio di limpiesa ku ta labora den e hotel nan. Ku e meta pa por komuniká mihó i duna un aporte na nos turismo e grupo menshoná a partisipá na e kurso di Inglés Nivel Básiko. Durante di e kurso a trata diferente tema manera entre otro:  gramátika, kon pa saluda,tekstó y spèling. Tambe e partisipantenan a  risibí un prueba na final. E kurso a keda duná pa MCO Training Center y kordiná pa Naharshka Juliao. Den ehekushon di e proyekto ‘Horecatraining Werkzoekenden’ tin algun entidat enbolbí; Ofisina di Turismo di Kòrsou (CTB) komo esun enkargá ku e proyekto den representashon di Gobièrnu di Kòrsou, Curaçao Hospitality Training Foundation (CHTF) ku ta responsabel pa kordinashon di e trainingnan.  E proyekto ‘Horecatraining Werkzoekenden’ ta  finansiá ku fondonan di desaroyo hulandes manehá pa USONA.