Na lugá di esaki lo bai tin un brindis chikitu entre 6’or pa 8’or di anochi na Sede di MFK
djabièrnè awor (17 di mèi 2013).

 Direktiva di Movementu Futuro Kòrsou huntu ku su lider polítiko sr. Gerrit Schotte a tuma e desishon pa para e selebrashon gigantesko di e di tres aniversario di partido MFK ku mester a tuma lugá djabièrnè 17 di mèi awor i ku lo a tèrminá e siguiente dia despues di un maratòn di 24 ora. Esaki ta nifiká outomátikamente ku e maratòn di firma di 24 ora tampoko lo no sigui riba e fecha aki. Durante un reunion di direktiva, Movementu Futuro Kòrsou a opta pa tene un brindis chikitu na Sede di MFK entre 6’or pa 8’or di anochi djabièrnè awor. Direktiva di Movementu Futuro Kòrsou i su lider polítiko sr. Gerrit Schotte no ta haña ku ta na su lugá pa selebrá den grandi tres aña di aniversario den e mes un siman ku a tuma despedida di Parlamentario i lider polítiko di Pueblo Soberano sr. Helmin Wiels (q.e.p.d.) Movementu Futuro Kòrsou lo anunsiá den futuro serkano un otro fecha pa e selebrashon maratóniko di tres aña di eksistensia di e partido.

Pa loke ta trata e programanan di Radio “Prohibí pa Lubidá”, esakinan tambe lo wòrdu kanselá e siman aki i lo kuminsá bèk djamars 21 di mèi 2013 na e mes un frekuensia di Radio MAS 99.

Ku e desishonnan aki, direktiva di Movementu Futuro Kòrsou i su lider polítiko sr. Gerrit Schotte ke duna respèt na defuntu parlamentario i lider polítiko di partido di koalishon Pueblo Soberano sr. Helmin Wiels.